2030 йилги Жаҳон чемпионати финали қаерда бўлиши айтилди

Испания Қироллик футбол федерацияси (RFEF) президенти Рафаэль Лусан 2030 йилги Жаҳон чемпионатининг финал учрашуви Испанияда ўтказилишини маълум қилди. Бу ҳақда Лусан кеча, 26 январь куни Мадридда бўлиб ўтган APDM’нинг ўнинчи йиллик гала-тадбирида маълум қилди.

“Испания кўп йиллар давомида ўзининг юқори ташкилотчилик салоҳиятини намойиш этиб келмоқда. 2030 йилги Жаҳон чемпионатига тайёргарлик жараёнларини айнан Испания бошқаради ва турнирнинг финал учрашуви ҳам шу ерда бўлиб ўтади”, дейди Рафаэль Лузан.

RFEF раҳбари, шунингдек, мазкур мундиалнинг тарихий аҳамиятига ҳам тўхталиб ўтган.

“Бу алоҳида аҳамиятга эга Жаҳон чемпионати бўлади, чунки ўша йили Уругвайда илк Жаҳон чемпионати ўтказилганига 100 йил тўлади. Биз ушбу даражага муносиб жавоб беришимиз лозим. Испания 2030 йилда тарихдаги энг яхши Жаҳон чемпионатига мезбонлик қилиши учун барча имкониятларни ишга соламиз”, дея қўшимча қилган Лузан.

2030 йилги Жаҳон чемпионатига Испания, Португалия ва Марокаш давлатлари биргаликда мезбонлик қилади.

Маълумот учун, навбатдаги FIFA Жаҳон чемпионати 2026 йилда АҚШ, Канада ва Мексикада бўлиб ўтади. Турнир тарихида илк бор унда 48 та миллий терма жамоа иштирок этади.