38 йил қамоқда ўтирган эркак айбсиз бўлиб чиқди

Буюк Британиялик Питер Салливан қотиллик учун айбланиб, деярли 40 йил қамоқда ўтирган бўлса-да, аслида айбсиз бўлиб чиққани боис озодликка чиқарилди. Апелляция суди жиноят иши бўйича янги далиллар топилгани сабаб ҳукмни бекор қилди. Бу ҳақда BBC хабар берди.

21 ёшли официант Дайан Синдалл 1986 йилда Англиянинг Беркхенд шаҳрида ишдан уйга қайтаётганида зўрланиб, ўлдирилган. Ўтган йили ушбу иш қайта кўриб чиқилиши учун махсус суд хатоларини текширувчи CCRC комиссияси томонидан апелляцияга юборилган. Бу эса ўша вақтда жиноят жойидан олинган сперма намуналарида илгари аниқланмаган ДНК излари топилгач амалга оширилган. Ушбу излар номаълум жиноятчига тегишли экани аниқланган.

Суд мажлисида Питер Салливаннинг ўзи ҳам қамоқхонадан видеоконференсия орқали иштирок этган. Ҳукм бекор қилингани эълон қилингач, у кўз ёшини тийиб тура олмаган.

Бу иш ҳозиргача Британия тарихидаги жабрланувчи ҳали тирик ва бегуноҳ бўлган энг узоқ давом этган суд хатоси сифатида қайд этилган. Салливаннинг баёнотини адвокати ўқиб эшиттирган. Унда айтилишича, у судьяларидан “на ғазабда, на хафа”.

Суд тингловидан сўнг, унинг синглиси Ким Смит нутқ сўзлаган.

“Бу ерда барча томонлар ютқазди. Улар қизидан айрилди ва уни ортга қайтариб бўлмайди. Биз эса Питерни қайтардик, энди эса унинг ҳаётини деярли буткул бошидан қуришимиз керак бўлади. Бундай ҳолат юз бергани ачинарли”, дея ҳалок бўлган официантнинг оиласига чуқур ҳамдардлик билдирган у.

Ҳам терговчилар, ҳам прокуратура вакилларининг бир овоздан таъкидлашларича, ўша даврда сперма намуналарини таҳлил қилиш ва таққослаш учун зарур технологиялар мавжуд бўлмаган.

Лондон шаҳридаги Қироллик Адлия судининг уч судьяси ҳукмни бекор қилиб, янги генетик далилларни тан олиш “адолат манфаатлари йўлида зарур ва мақсадга мувофиқ” эканини таъкидлаган.

Судьялардан бири лорд Холройд жабрланувчининг танасидаги шикастланишлар “ҳужумнинг жинсий тусда бўлганини аниқ кўрсатади” деган ва бунинг асосида сперма намунаси айнан ҳақиқий қотилга тегишли бўлганини юқори эҳтимоллик билан тан олиш зарурлигини билдирган.

“Жиноятда бир нечта одам иштирок этганига асос йўқ ва жинсий алоқа ўзаро розилик билан бўлганига доир ҳеч қандай далил мавжуд эмас”, деган у.

Хабар берилишича, суд мажлиси тугаганидан кейин дарҳол Питер Салливан озодликка чиқарилган. У қарийб 38 йил-у 8 ой қамоқда ўтирган – жами 14 113 кун.

Эслатиб ўтамиз, аввалроқ Японияда хўжайини, унинг хотини ва икки боласининг қотили сифатида айбланиб, 1968 йилда ўлимга ҳукм қилинган Ивао Ҳакамада суд томонидан оқланганди. Ҳакамада 2011 йилда ўлим жазосини энг кўп кутган инсон сифатида эътироф этилган.