АҚШда қор бўрони сабаб камида 7 киши ҳалок бўлди

АҚШда қор ёғиши ва совуқ билан бирга келган бўрон оқибатида камида етти киши ҳалок бўлди. Бу ҳақда CNN хабар берди.

Бўрон АҚШнинг шарқий ва жанубий штатларини қамраб олган. Теннесси штатида 330 мингдан ортиқ киши электрсиз қолган, Миссисипи штатида – 160 мингдан ортиқ, Луизиана штатида эса тахминан 135 минг абонент электр таъминотисиз қолган. Расмийлар электр узилишларининг сабабини музлаш билан боғлашганини маълум қилган.

Нью-Йорк шаҳар мэри Зоҳран Мамдани аҳолини қор ёғиши давом этаётган пайтда уйда қолишга чақирган. Шаҳар бўйлаб айрим ҳудудларда 23 см гача қор ёққан.

Охирги икки кун ичида АҚШда 17 мингдан ортиқ авиация рейслари бекор қилинган. Нью-Йоркдаги Ла-Гуардиа халқаро аэропорти ва Пенсилвания штатидаги Леҳигҳ Валлей аэропорти фаолиятини вақтинча тўхтатган.

FlightAware парвозларни кузатиш сайти маълумотларига кўра, АҚШ бўйлаб режалаштирилган қарийб 11 мингта авиақатнов бекор қилинган. Ундан бир кун аввал эса 4 мингдан ортиқ рейс бекор қилинган.

Бундан ташқари, Вашингтондаги Рональд Рейган номидаги миллий аэропорт кеча, 25 январь куни барча рейслар бекор қилинганини маълум қилган. FlightAware маълумотларига кўра, Нью-Йорк, Филадельфия ва Шимолий Каролинадаги Шарлотт каби йирик шаҳарлардаги аэропортларда рейсларнинг 80 фоиздан ортиғи бекор қилинган.