Ангренда юк машинаси 4 та автомобиль билан тўқнашиб кетди. Қурбонлар бор (видео)

Тошкент вилоятининг Ангрен шаҳрида юк машинаси ва енгил автомобиллар иштирокида йирик йўл-транспорт ҳодисаси юз берди ва оқибатда икки киши воқеа жойида ҳалок бўлди. Бу ҳақда вилоят Йўл ҳаракати хавфсизлиги бошқармаси хабар берди.

Маълум қилинишича, кеча, 26 апрель куни соат 23:10 ларда А-373 автомобиль йўлининг 93 чи километрида Howo русумли юк машинаси ҳайдовчиси Р.Н. ҳаракат вақтида бошқарувини йўқотиб, шу йўналишдаги 4 та трансорт воситалари билан тўқнашиб йўл-транспорт ҳодисасини содир этган. 

Ҳодиса оқибатида Cobalt автомашинасида бўлган ҳайдовчи И.Х. ҳамда йўловчи З.Т. воқеа жойида вафот этган.

Қолган транспорт воситаларида бўлган 4 нафар фуқаролар турли даражадаги тан жароҳатлари билан тиббиёт бирлашмасига олиб борилган.

Ҳозирда ҳолат юзасидан Тошкент вилояти ИИББ ҳузуридаги Тергов бошқармаси томонидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 3-қисми “а” банди билан жиноят иши қўзғатилиб, тергов ҳаракатлари олиб борилмоқда.

Эслатиб ўтамиз, аввалроқ Тошкент шаҳрининг Олмазор туманида Lacetti ва Matiz машиналари тўқнашиб кетиши оқибатида Matiz ҳайдовчиси вафот этганди.