Аёл “жин чиқариш” маросимида ўғлини ўлдириб қўйди

АҚШнинг Флорида штатида 41 ёшли аёл ўзининг 6 ёшли ўғлини “жин чиқариш” маросимида ўлдирганликда айбланмоқда. Бу ҳақда “New York Post” хабар берди.

Тергов маълумотларига кўра, аёл боланинг танасида “жин чиқариш” маросимини ўтказишга уринган. Афсуски, бу маросим боланинг ҳалок бўлиши билан якунланган.

“Онаси билан суҳбат давомида биз шуни билдикки, у боладаги жинларни чиқаришни Худо буюрганига чин дилдан ишонган. Бола ҳаракатсиз ҳолга келиб, амалда вафот этганидан сўнг, у бу ҳолатни боланинг жинлардан тозалангани деб талқин қилган ва у бола яна тирилиб келади деб, уни кутишда давом этган”, дея нашрга изоҳ берган полиция вакиллари.

Ҳуқуқ-тартибот органлари бола жасадини тахминий ўлим санасидан 12 кун ўтиб топган. Шу вақт ичида жасад аллақачон чирий бошлаган эди. Айни пайтда она ўзининг ижтимоий тармоқларида фаол бўлиб, у ерда диний мазмундаги постлар ва осмондан берилган ваҳийлар ҳақидаги ёзувларни улашишда давом этган.

Полициячининг сўзларига кўра, аёл охирги ойлар ичида руҳий жиҳатдан беқарор ва яккаланиб қолган.

Мазкур ҳодиса юзасидан аёлга қарши жиноий иш қўзғатилган, у ҳибсга олинган. Яқин орада суд унинг қамоғини узайтириш ёки озодликка чиқариш масаласини кўриб чиқади. Шунингдек, у руҳий ҳолатини аниқлаш учун психиатрия экспертизасидан ҳам ўтказилади.

Эслатиб ўтамиз, аввалроқ Эроннинг Теҳрон вилоятига қарашли Исломшаҳр шаҳрида эркак ўзининг 18 ёшли қизи Фотима Султонийни гўзаллик салонида ишлаётганини билиб қолганидан сўнг омма олдида пичоқлаб ўлдирганди. Султоний отасининг салбий муносабатидан қўрққани учун гўзаллик салонида яширинча ишлай бошлаган. Айтилишича, эркак илгари ҳам хотини ва қизига нисбатан мунтазам зўравонлик қилган.