“Барселона” ЕЧЛда қизил карточка олиш бўйича пешқадамга айланди

Каталониянинг “Барселона” клуби ҳимоячиси Пау Кубарси Европа Чемпионлар лигаси чорак финал дастлабки ўйинидан ўрин олган “Атлетико Мадрид”га қарши ўйинда Жулиано Семионега нисбатан ишлатган қўполлиги учун қизил карточка олиб майдондан четлатилди.

Шу тариқа бу четлатиш клуб учун Чемпионлар лигасида сўнги ўн йилдаги ўн иккинчиси бўлди ва бу борада мутлақ рекордчи бўлиб турибди. Эътиборли жиҳати ушбу карточкаларнинг учдан бири Ҳанси Флик мураббийлигидаги вақтга тўғри келади. Германиялик мутахассис даврида – 2024-2025 йилги мавсум бошида Эрик Гарсия “Монако”га қарши ўйинда, ўша мавсумнинг 1/8 финалида Пау Кубарси “Бенфика”га қарши ўйинда ва 2025-2026 йилги мавсумда Роналд Араухо “Челси”га қарши ўйинда қизил карточка олган.

Кўплаб мутахассислар Флик келгандан сўнг четлатилиш кўпайганини жамоанинг юқори чизиқда ўйнашини сабаб қилиб кўрсатмоқда.

Маълумот ўрнида, “Барселона”нинг “Атлетико Мадрид”га қарши жавоб ўйини жорий йилнинг 14 апрель куни Мадридда бўлиб ўтади.

Рамазон Усанов