Блокададан сўнг нефть нархи яна ошиб кетди

Бугун, 13 апрель куни АҚШ Президенти Дональд Трамп Эрон портларини блокада қилишга буйруқ берганидан сўнг глобал бозордаги нефтнинг нархи 7 фоизгача кўтарилиб, бир баррель учун 100 доллардан ошиб кетди. Бу ҳақда BBC хабар берди.

Нефть нархининг глобал эталони бўлган Brent нефтининг бир баррели 102,02 долларга (75,91 фунт стерлинг) етган. Глобал бозордаги нарх эса 7,5 фоизга ошиб, 103,78 долларни ташкил этмоқда. 

АҚШ Марказий қўмондонлиги (CЕNТCОМ) 12 апрель куни кечқурун берган баёнотида Эрон портларини блокадалаш бўйича баёнот билан чиққан эди. Қамал бугун, 13 апрель, Теҳрон вақти билан соат 10:00 дан бошланиши билдирилган. Ҳарбий блокада Эрон портларига кирувчи ва ундан чиқувчи барча денгиз транспортларига қўлланишини айтилди. Бунга Эроннинг портлари ва қирғоқбўйи ҳудудлари, жумладан, Форс ва Уммон кўрфазига кирадиган ёки ундан чиқадиган барча давлатларнинг кемалари киради.

Марказий штаб бошқа давлатларнинг кемалари Ҳормуз бўғозида эркин ҳаракатланиши мумкинлигини айтган бўлсада, АҚШ Президенти Дональд Трамп ўзининг Тruth Social ижтимоий тармоғидаги саҳифасида Ҳормуз бўғозига киришга ёки ундан чиқишга уринаётган ҳар қандай  кемаларни нишонга олинишини айтган. 

“Биз зудлик билан Ҳормуз бўғозига киришга ва чиқишга уринаётган ҳар қандай кеманинг ҳаракатланишини чеклаймиз. Дунёдаги энг кучли флотга Қўшма Штатлар эгалик қилади. Бир кун келиб биз албатта Ҳормуз бўғозида ҳаракатланаётган барча кемаларга “Ҳаммага киришга рухсат, ҳаммага чиқишга рухсат” тамойилини қўллаймиз. Мен ҳарбий-денгиз кучларимизга Эронга бож тўлаган ҳар бир кемани қидириб топишни ва тўхтатишни буюрдим. Ноқонуний бож тўлаган ҳар ким очиқ денгиздан хавфсиз ўтолмайди. Америка флоти бўғозларга эронликлар томонидан қўйилган барча миналарни ҳам йўқ қилишни бошлаймиз. Америка кемаларига ёки бошқа тинч кемаларга ўқ узган ҳар қандай эронлик дўзахга учиб кетади!” дейди Оқ уй раҳбари.

Эслатиб ўтамиз, аввалроқ Эрон АҚШнинг портларни блокада қилиш таҳдидига жавоб қайтаргани ҳақида хабар берилган эди.

Ҳожиакбар Муҳаммаджонов