Бразилиядаги иқлим конференциясида ёнғин чиқди

Кеча, 20 ноябрь куни Бразилиянинг Белен шаҳрида ўтаётган БМТ иқлим конференцияси – COP30 тадбири ўтказилаётган жойда ёнғин юз берди. Бу ҳақда “The Independent” хабар берди. 

Интернетда эълон қилинган кадрларда павильонлардан бирини олов қамраб олгани, хавфсизлик ходимлари эса ҳуштак чалиб, одамларни эвакуация қилишга чақираётгани кўринади.

Бошқа павильонларда ёнғин сигнализацияси ишга тушиб, тушдан кейинги муҳокамалар тўхтаб қолган. Иштирокчилардан бинони тарк этиш сўралган.

Ҳодиса жойига тезда ёнғин ўчириш машиналари етиб борган ва олов ўчирилган.

Бразилия Туризм вазири Селсо Сабинонинг айтишича, тегишли хизматлар ёнғин сабабларини аниқлаш билан шуғулланади. 

“Мен бу қасддан қилинган жиноят деб ўйламайман”, деган Сабино. 

Қайд этилишича, ёнғин конференциядаги муҳокамаларга янада таранглик қўшган, чунки саммит якуний келишувлар босқичига яқинлашаётган бўлган.

Ҳодиса оқибатида ҳеч ким жабрланмаган.

Маълумот учун, COP30 – бу Бирлашган Миллатлар Ташкилотининг Иқлим ўзгариши бўйича конференциясининг 30-йиғилиши. COP Париж келишуви ва БМТнинг Иқлим ўзгариши тўғрисидаги доиравий конвенцияси иштирокчи давлатларининг йиллик йиғилиши.

COP саммитларида дунёнинг деярли барча мамлакатлари иқлим ўзгаришини камайтириш бўйича мажбуриятлар, молиявий ёрдам ва глобал келишувларни муҳокама қилади.

Эслатиб ўтамиз, аввалроқ Хорватия пойтахти саналмиш Загреб шаҳрида 16 қаватли бино ёниб кетганди.