Бухорода ўз уйида фоҳишахона ташкил қилган эркак ушланди

Бухоро вилоятининг Шофиркон туманида 26 ёшли эркак ўз уйида фоҳишахона ташкил қилгани учун қўлга олинди. QALAMPIR.UZ суд ҳужжати билан танишди.

Тезкор тадбир вақтида у танишларига уйидаги хонани 200 минг сўмга бергани аниқланган. Эркак судда қилган ишидан пушаймонлигини билдириб, айбини тўлиқ тан олган. 

Жиноят ишлари бўйича Шофиркон туман суди уни Жиноят кодексининг 131-моддаси (қўшмачилик қилиш ёки фоҳишахона сақлаш) бўйича айбли деб топган. 

Ҳукмга кўра, унга 2 йил-у 6 ой озодликни чеклаш жазоси тайинланган. Суд жараёнида олинган 200 минг сўм далил сифатида давлат ҳисобига ўтказилган. 

Судда айбланувчининг ҳолатини енгиллаштирувчи омиллар сифатида пушаймонлиги эътироф этилган. 

Эслатиб ўтамиз, аввалроқ Бухоро вилоятининг Шофиркон туманида қоровул 60 минг сўм эвазига мактаб спорт залининг кийиниш хонасида фоҳишахона ташкил қилганди. Унга ушбу қилмиши учун 1 йил озодликни чеклаш жазоси тайинланган. Қолаверса, айни шу туманнинг туғуруқхонасида фоҳишахона ташкил этган аёл ҳам ушланганди. У бунинг эвазига ўз мижозларидан 200 минг сўмдан пул олиб келган.