Чемпионлар лигасининг энг яхши футболчиси аниқланди

ПСЖ ҳамда Грузия миллий терма жамоаси ярим ҳимоячиси Хвича Кварацхелия Чемпионлар лигасининг 2025-2026 йилги мавсумида энг яхши футболчи деб топилди. Бу ҳақда UEFA расмий сайти маълум қилди.

Жорий йилнинг 30 май куни Будапешт шаҳрида бўлиб ўтган финал учрашувида Франциянинг ПСЖ клуби Англиянинг “Арсенал” жамоасини асосий ва қўшимча вақтда 1:1 ҳисобидаги дурангдан сўнг пенальтилар сериясида 4:3 ҳисобида мағлуб этди ва кетма-кет иккинчи бор Чемпионлар лигаси бош совринини қўлга киритди.

Ушбу баҳсда Кварацхелия пенальти ишлаб берди ва уни франциялик ҳужумчи Усмон Дембеле аниқ зарба билан голга айлантирди.

Грузиялик футболчи якунланган Чемпионлар лигаси мавсумида 16 та учрашувда майдонга тушиб, 10 та гол урди ва 6 та голли узатмани амалга оширди.

Маълумот учун, 25 ёшли Кварацхелия ПСЖ сафида икки карра Франция чемпиони, Франция кубоги ва Суперкубоги соҳиби, икки карра Чемпионлар лигаси ғолиби бўлди. Шунингдек, у UEFA Суперкубоги ва Қитъалараро кубокни ҳам бир мартадан қўлга киритган.