Доҳадаги ўзбекистонликлар тураржой билан таъминланди

Кеча, 4 март куни Доҳада қийин аҳволга тушиб қолган 91 нафар ўзбекистонлик вақтинчалик уй-жой билан таъминланди. Бу ҳақда “Дунё” ахборот агентлиги хабар берди.

Қайд этилишича, Ўзбекистон элчихонаси томонидан Қатарда бўлиб турган фуқаролар ҳолидан хабар олиниб, уларга бошпана топишда кўмаклашилган. Хусусан, Қатар туризм ташкилоти билан келишилган ҳолда 91 нафар ўзбекистонлик турар-жойлар билан таъминланган.

Элчи Ашраф Хўжаев Доҳа портига ташриф буюриб, “Celestine cruisesс” кемасида бўлган 71 нафар ўзбекистонлик билан учрашган. Суҳбат давомида уларга юзага келган вазият ҳақида батафсил маълумот берилган. Ҳозирда Ўзбекистон ҳукумати Қатарнинг тегишли идоралари билан ҳамкорликда фуқаролар хавфсизлигини таъминлаш ҳамда уларни ортга қайтариш механизмларини ишлаб чиқаётганини таъкидлаган.

Шунингдек, элчихона вакиллари “Grand Regal”, “Hampton”, “Jouri Al Murwab” ва “Retaj Al Rayyan” меҳмонхоналарига ташриф буюган. У ерда вақтинча истиқомат қилаётган фуқароларлар рўйхати шакллантирилган.

Маълумот ўрнида, айни пайтда Қатар ҳаво ҳудуди ёпиқлигича қолмоқда. Мамлакатдаги хорижий сайёҳлар қўшимча расмий маълумот берилишини кутмоқда.

Эслатиб ўтамиз, аввалроқ Ўзбекистоннинг Бирлашган Араб Амирликларидаги Бош консулхонаси Дубай, Шаржа ва Абу-Даби шаҳарларидан ортга қайта олмаётган ўзбекистонликларни меҳмонхонага жойлаштирганди.