Дунёдаги энг камбағал собиқ президент вафот этди

Кеча, 13 май куни Уругвайнинг собиқ президенти (2010-2015) Хосе Мухика 89 ёшида вафот этди. Бу ҳақда мамлакатнинг амалдаги раҳбари Яманду Орси Х’да маълум қилди.

“Биз ҳамкасбимиз Пепе Мухика вафот этганини чуқур қайғу билан эълон қиламиз. Президент, фаол, етакчи ва менежер. Сизни жуда соғинамиз, азиз нуроний. Бизга берган барча нарсангиз ва халқингизга бўлган чуқур меҳрингиз учун раҳмат”, деб ёзади у.

Мухика ўтган йилги президентлик сайловларида Орсини қўллаб-қувватлаган.

Маълумот учун, ўтган йили Уругвайнинг собиқ раҳбари қизилўнгач саратонига чалинганини маълум қилган. Жорий йилнинг январь ойи бошида “Busqueda” нашрига берган интервьюсида у саратон касаллиги унинг жигарига ҳам ўтганини билдирган. Шундан сўнг Мухика касаллик билан курашишни тўхтатишга қарор қилган.

“Нима учун? Мен кекса одамман ва иккита сурункали касаллигим борлиги учун. Мен биокимёвий даволаш ёки жарроҳлик амалиётига номзод эмасман, чунки танам бунга дош бера олмайди”, деб тушунтирган у ўз қарорини.

Хосе Мухика 1935 йил 20 майда Уругвай пойтахти Монтевидеода туғилган. У сўл “Тупамарос” ҳаракати аъзоси бўлган ва қарийб 14 йилини ҳарбий қамоқхоналарда ўтказган. 2005 йилдан 2008 йилгача Уругвай чорвачилик, қишлоқ ва балиқчилик вазири лавозимида ишлаган. 2009 йилги президентлик сайловларида у “Кенг фронт” сўл партиясидан номзод бўлган ва ғалаба қозонган. 2010 йил март ойида у президент лавозимини эгаллаган.

Президентлик даврида у бир қатор либерал ислоҳотларни амалга оширган. 2014 йилда Мухика Уругвайда марихуанадан фойдаланишни қонунийлаштирувчи қонунни имзолагани учун Тинчлик учун Нобел мукофотига номзод бўлган. У 2015 йилда президентлик лавозимини тарк этган ва кейин Сенатга (Миллий Ассамблеянинг юқори палатаси) сайланган, бироқ 2018 йил бошида истеъфога чиққан.

Мухика ўзининг камтарона турмуш тарзи учун “дунёдаги энг камбағал президент” лақабини олган. У президентлик даврида Монтевидео яқинидаги оилавий фермада яшаган ва деярли бутун маошини хайрия ишларига берган. 2014 йилда унга 1987 йилда ишлаб чиқарилган Volkswagen Beetle ни 1 миллион долларга сотишни таклиф қилишган, бироқ Мухика рад жавобини берган.

Сенатдан кетгач, у сенаторнинг нафақасини ҳам рад этган.

Эслатиб ўтамиз, аввалроқ америкалик давлат ва сиёсат арбоби, Демократик партиядан АҚШнинг 39-президенти Жимми Картер 100 ёшида вафот этганди. Жимми Картер Жоржия штатида вафот этган. Унинг ўлим сабаблари маълум қилинмаган.