Эркак якуний босқичдаги саратон билан 40 йил яшади

Грециялик эркак Стаматис Мораитис ўпканинг якуний босқичдаги саратони билан 40 йил умр кўришга муваффақ бўлди. Бу ҳақда кеча, 16 январь куни “Daily Express” хабар берди.

Нашрнинг ёзишича, Америка Қўшма Штатларида яшаган, келиб чиқиши грециялик бўлган Стаматис Мораитис бундан 40 йил аввал ўпка саратонига чалинган. Ўша пайтда шифокорлар унга кўпи билан ярим йил умри қолганини айтган, бироқ бу прогноз амалга ошмаган. Ташхисдан сўнг Мораитис ватани – аҳолиси узоқ умр кўриши билан машҳур бўлган Икария оролига қайтишга қарор қилган.

“Даволаб бўлмайдиган ўпка саратони ташхиси қўйилиб, бир неча ой умри қолгани айтилган инсон ўзи туғилган чекка оролга қайтиш қарорини қабул қилгач, қарийб 40 йил умр кўрди”, дейилади хабарда.

Шифокорлар унга тахминан 60 ёшларида оғир ташхис қўйган ва мутахассислар организмидаги ўсмалар даволанмаслигини тасдиқлаган. Шундан сўнг бемор даволанишдан воз кечиб, Икарияга йўл олган.

Оролга кўчиб боргач, Мораитиснинг аҳволи аста-секин яхшилана бошлаган. У яна жисмоний меҳнатга қайтиб, сабзавот етиштирган, узумзорларга қараган. Кўп вақтини дўстлари билан ўтказган ва сокин, мувозанатли ҳаёт кечирган. Йиллар ўтиб, у соғлиғи қандай яхшилангани сабабини аниқлаш учун АҚШга қайтишга қарор қилган. Бироқ у қайтгач, унга ташхис қўйган шифокорлар вафот этганини билган.

Ушбу воқеа тадқиқотчиларнинг эътиборини тортган. “National Geographic” эксперти, “кўк зоналар” (дунёда одамлар ўртача кўрсаткичдан анча узоқ яшайдиган ҳудудлар) феноменини ўрганган Дэн Бютнернинг фикрича, Мораитис аҳволининг яхшиланишига стресс даражасининг кескин камайиши ва турмуш тарзининг ўзгариши сабаб бўлган.

Эслатиб ўтамиз, аввалроқ тиббиёт соҳасидаги ютуқлар ва хавф омилларини камайтиришга қаратилган саъй ҳаракатларга қарамай, бутун дунё бўйлаб саратон касаллигидан ўлим сони кейинги 25 йил ичида қарийб 75 фоизга ошиши мумкинлиги ҳақида хабар берилган эди.