Эрон АҚШни сулҳни бузишда айблаб, Америка кемаларига ҳужум қилди

Эрон АҚШ ҳарбий-денгиз кучлари томонидан Эрон байроғи остида сузаётган кемага қилинган ҳужумни сулҳ шартларининг бузилиши деб баҳолади. Бунга жавобан, Эрон Қуролли кучлари дронлар ёрдамида АҚШнинг бир нечта ҳарбий кемаларига зарба берди. Бу ҳақда “Tasnim” хабар берди.

Мамлакат Қуролли кучлари – “Хотам ал-Анбиё” марказий штаби вакилининг баёнотида айтилишича, АҚШ сулҳни бузиб, денгиз қароқчилиги ҳаракатини содир этган ва Уммон қўлтиғи сувларида Эрон савдо кемаларидан бирига ҳужум қилган. Оқибатда кема навигация тизими ишдан чиқарилган ҳамда унга АҚШ денгиз пиёдалари туширилган.

Эрон томони АҚШ армиясининг “денгиз қароқчилиги ва қуролли ҳужуми”га тез орада жавоб қайтарилишини маълум қилган.

Шунингдек, баёнотда ҳужумга учраган “Тоуска” контейнер кемаси Хитойдан Эронга йўл олгани қайд этилган.

Аввалроқ, АҚШ Президенти Дональд Трамп Эрон байроғи остида ҳаракатланган юк кемасига АҚШ ракета эсминеци томонидан зарба берилганини билдирган. Унинг сўзларига кўра, кема экипажи буйруққа бўйсунмагач, ҳарбий кема унинг двигатель бўлимига зарба бериб, жиддий шикаст етказган.

Кейинчалик CENTCOM воқеа тафсилотларини маълум қилган. АҚШ ҳарбийлари Эрон кемаси экипажини олти соат давомида блокадани бузаётганидан огоҳлантирганини билдирган. Шундан сўнг экипажга двигатель бўлимини тарк этиш буюрилган ва эсминец 5 дюймли MK 45 тўпидан зарба бериб, кеманинг ҳаракат тизимини ишдан чиқарган. Шундан кейин АҚШ денгиз пиёдалари “Тоуска”нинг бортига чиққан.

АҚШ 13 апрелдан бошлаб Ҳормуз бўғозида блокада жорий этган. Хабарда таъкидланишича, америкалик ҳарбийлар Эрон портларига кираётган ва у ердан чиқаётган кемалар йўлини тўсмоқда.

Эслатиб ўтамиз, жорий йилнинг 18 апрель куни Эрон АҚШ томонидан давом этаётган денгиз блокадаси сабаб Ҳормуз бўғози яна ёпилганини маълум қилганди. Теҳроннинг таъкидлашича, Эрон илгари эришилган келишувларга амал қилган ҳолда ва ҳалол ёндашув асосида Ҳормуз бўғози орқали чекланган миқдордаги нефть ва савдо кемаларининг назорат остида ўтишига рухсат берган. Бироқ АҚШ яна “хиёнаткорлик” кўрсатиб, блокада ниқоби остида денгиздаги ноқонуний ҳаракатларни давом эттирмоқда.