Эрон АҚШни уранни ўғирлашга уринишда айблади

АҚШ учувчиларни қутқариш миссияси ниқоби остида Эрон уранини ўғирлашга ҳаракат қилган. Бу ҳақда бугун, 6 апрель куни Эрон Ташқи ишлар вазирлиги расмий вакили Исмоил Бағоий SNN телеканали эфирида гапирди.

Унинг сўзларига кўра, АҚШнинг ўз учувчиларини қутқариш бўйича операцияси Эрон уранини ўғирлашга бўлган уриниш учун ниқоб бўлиши мумкин, бироқ бу режа муваффақиятсизликка учраган.

“Бу бойитилган уранни ўғирлаш учун қилинган алдов манёври бўлиши мумкинлигини эътибордан четда қолдириб бўлмайди”, дейди Бағоий.

Дипломатик идора вакили АҚШнинг учувчиларни қутқариш миссиясини 1980 йил апрель ойида Теҳрондаги гаровга олинганларни қутқариш мақсадида амалга оширилган “Бургут чангали” операциясига қиёслаган. Ўшанда америкаликлар бир нечта ҳаво кемаларини йўқотган, шунингдек, саккиз киши ҳалок бўлган.

Эслатиб ўтамиз, аввалроқ Эронда АҚШ бомбардимончи самолёти уриб туширилганди. ОАВда бир учувчи асирга олингани ҳақида маълумот пайдо бўлди. Ҳарбийлар учун мукофот эълон қилинди. Шунингдек, АҚШ оммавий ахборот воситаларида улардан бири қутқарилгани ҳақида хабарлар тарқалди. Кеча, 6 апрель куни АҚШ Президенти Дональд Трамп икки учувчи қутқарилганини маълум қилди. Оқ уй раҳбарининг сўзларига кўра, иккала қутқарув операцияси ҳам талафотларсиз ўтган. Шу билан бирга, Эрон томони ушбу миссия давомида Америка армияси иккита “Black Hawk” вертолёти ва битта “С-130” ҳарбий транспорт самолётини йўқотганини даъво қилмоқда.