Эйнштейннинг скрипкаси сотилди

Буюк олим Альберт Эйнштейнга тегишли бўлган скрипка кимошди савдосида 860 000 фунт стерлингга (1 153 758,80 доллар) сотилди. Бу ҳақда “Daily Mail” хабар берди.

Маълумотларга кўра, Альберт Эйнштейн бу скрипкани Германияда 1890 йилларнинг охирида Швейцарияга кўчиб кетишдан олдин сотиб олган. 1932 йилда Германияда нацистлар ҳокимият тепасига келгач, Эйнштейн АҚШга кўчиб ўтган. Олим шахсий буюмларини ҳимоя қилиш учун уларни дўсти, физик Макс фон Лауэга берган. Буюмлар орасида Эйнштейн сотиб олган биринчи скрипка ҳам бўлган. Шунингдек, у дўстига велосипедини ва отаси совға қилган фалсафа китобини ҳам берган.

Орадан 20 йил ўтгач, фон Лауэ бу нарсаларни Эйнштейннинг мухлиси Маргарета Ҳоммричга берган. Маргаретанинг невараси уларни кимошди савдосига қўймагунча, буюмлар Ҳоммрич оиласида 70 йилдан кўпроқ вақт давомида сақланиб қолган. Мутахассислар скрипканинг нархини 268 минг доллардан 402 минг долларгача баҳолаган.

Қайд этиш жоиз, Эйнштейн болалигида онасининг илтимосига кўра скрипка чалишни бошлаган. У дўстлари учун Моцарт, Бах ва Бетховенни чалишни яхши кўрган. Шунингдек, олим мусиқа унга фикрлашга ёрдам беришини ва агар физик бўлмаганида мусиқачи бўлишини айтган.

Эслатиб ўтамиз, 2022 йилда Эйнштейннинг устозига тегишли бўлган скрипка 15,3 млн долларга сотилган эди.

Бунёд Келдибоев