Филиппинда тайфун оқибатида 66 киши ҳалок бўлди (видео)

Филиппинда содир бўлган “Калмаэги” тайфуни оқибатида камида 66 киши ҳалок бўлди. Бу ҳақда “Reuters” хабар берди.

Қайд этилишича, табиий офат Филиппиннинг марказий қисмига ва Палаван оролининг айрим ҳудудларига зарба берган, сўнгра Жанубий Хитой денгизи томон йўналган. Ҳалок бўлганлар орасида гуманитар миссия вақтида Минданао оролининг Агусан-дель-Сур ҳудудида ҳалокатга учраган вертолётдаги олти нафар ҳарбий ҳам бўлган. Филиппиндаги Табиий офатлар оқибатларини бартараф этиш агентлиги яна 13 киши бедарак йўқолганини маълум қилган.

Филиппин давлат метеорология хизматининг сўнгги маълумотига кўра, жорий йилнинг 4 ноябрь куни эрталаб “Калмаэги” тайфуни қуруқликка чиққач, кучсизланган. Жанубий Хитой денгизи устида яна кучайиши кутилаётгани ҳақида огоҳлантирилган. “Калмаэги” тайфуни бу йил Филиппинларда рўй берган 20-тропик циклон бўлган.

Эслатиб ўтамиз, аввалроқ Индонезиянинг шарқий Папуа минтақасида кучли ёмғирдан кейин содир бўлган сув тошқинлари ва кўчкилар оқибатида камида 15 киши ҳалок бўлган эди.

Моҳичеҳра Қадамова