Грузияда қулаган самолётдаги ҳарбийларнинг жасадлари Туркияга етказилди (видео)

Грузия ва Озарбайжон чегарасида C130 туридаги ҳарбий транспорт самолёти ҳалокатга учраганидан сўнг ҳалок бўлган ҳарбий хизматчиларнинг жасадлари Туркияга етказилди. Бу ҳақда “Anadolu” хабар берди.

Қайд этилишича, қидирув-қутқарув ишларида ҳалокат жойида топилган жасадлар, зарур тартиб-таомилларни ўтказгандан сўнг, Тбилиси аэропортига олиб келинган. Тбилисидан учган самолёт Мюртед аэродромига қўниб, жасадлар тез ёрдам автомобилларига юкланиб, суд-тиббий экспертизага юборилган.

Грузиянинг Кахетия вилоятидаги Сигнахи туманида – Озарбайжон чегарасига яқин тоғли ҳудуддан тахминан беш километр масофада ҳалок бўлган ҳарбий хизматчиларнинг жасадлари топилган. Суд-тиббий экспертизадан сўнг жасадлар Тбилисидаги халқаро аэропортдаги А400М ҳарбий транспорт самолётига жойлаштирилган.

Самолёт кеча, 13 ноябрь куни маҳаллий вақт билан 19:30 да Тбилиси халқаро аэропортидан учиб, Туркия томон йўл олган.

Маълумот учун, 11 ноябрда Грузия ва Озарбайжон чегарасида C130 туридаги ҳарбий транспорт самолёти ҳалокатга учраганида, самолётда йигирма киши бўлган. Ҳалокат ҳудудида қидирув ишлари бошланган.

Туркия Президенти Ражаб Тойиб Эруған 12 ноябрь куни самолётнинг “қора қутиси” топилганини эълон қилиб, тергов бошланганини маълум қилган. У ҳалок бўлган йигирма кишидан 19 жасад топилганини ва охирги жасадни излаш ишлари давом этаётганини билдирган.

Миллий мудофаа вазирлиги томонидан кун давомида эълон қилинган баёнотга кўра, қидирув ишлари натижасида охирги ҳалок бўлган ҳарбий хизматчининг жасади ҳам топилган.