Кениядаги ҳукуматга қарши намойишларда 16 киши ҳалок бўлди

Жорий йилнинг 25 июнь куни Кения пойтахти Найробида бўлиб ўтган норозилик намойишлари вақтида камида 16 киши ҳалок бўлди, яна тўрт юзга яқин одам жароҳат олди. Бу ҳақда “The Guardian” хабар берди.

Нашрга кўра, ушбу намойиш ўтган йилги ҳукуматга қарши бўлган норозиликлар чоғида ҳалок бўлган фуқароларни ёд этиш мақсадида ташкил этилган. 

Ўтган йилги норозиликларда 60 дан ортиқ одам ҳукуматнинг солиқларни ошириш ҳақидаги қонунига қарши чиқиб, кўчага чиққанида ҳалок бўлган эди. Ўша вақтда полиция норозилар парламент биносига бостириб киришга ҳаракат қилганида ўқ очган эди. Бу йилги намойишларда ҳам полиция худди шундай чораларни кўрган.

Кения Инсон ҳуқуқлари миллий комиссияси ҳалок бўлганлар сони 16 нафар эканини тасдиқлаган. Ташкилот, шунингдек, полицияни ҳаддан ташқари куч ишлатганликда айблаган. Уларнинг билдиришича, тартибни сақлаш учун резина ўқлар, жанговар ўқ-дорилар ва сув пуркагичлардан фойдаланилган, оқибатда кўплаб одамлар тан жароҳати олган.

“Reuters” ахборот агентлигига Найробидаги Кения миллий шифохонасининг масъул шифокори 107 киши шифохонага ётқизилганини тасдиқлаган, уларнинг кўпчилиги ўқ еган.

Полиция бу ҳолат юзасидан изоҳ бермаган, аммо камида 61 киши ҳибсга олинганини маълум қилган.

“The Guardian” нашрининг қўшимча қилишича, полиция Найроби марказий ишбилармонлик туманидан бир неча километр наридаги асосий йўлларни тўсиб қўйган, автобус ва микроавтобусларни шаҳар марказига киришга йўл қўймаган. Полиция шунингдек, парламент ва Президентнинг расмий қароргоҳи каби муҳим биноларга олиб борувчи йўлларни тиканли симлар билан тўсиб қўйган.

Эслатиб ўтамиз, аввалроқ Кения марказидаги бошланғич мактаб-интернатда содир бўлган ёнғин оқибатида 17 нафар ўқувчи ҳалок бўлганди.