Хоманаийнинг эҳтимолий вориси ким бўлиши айтилди

АҚШ Марказий разведка бошқармаси (МРБ) ҳужумлардан икки ҳафта олдин ўтказилган таҳлилларга таяниб, агар АҚШ ва Исроил операцияси давомида Эрон Олий раҳнамоси Оятуллоҳ Али Хоманаий ўлдирилса, унинг ўрнини Ислом инқилоби қўриқчилари корпусининг ашаддий вакиллари эгаллаши мумкинлигини тахмин қилган. Бу ҳақда разведка маълумотларидан хабардор бўлган иккита манбага таяниб, “Reuters” хабар берди.

Нашрнинг ёзишича, ушбу элита ҳарбий кучининг асосий вазифаси Эрондаги шиа мусулмон уламолари бошқарувини ҳимоя қилишдан иборат. Макзур баҳолашлар АҚШ аралашувидан кейин Эронда нималар содир бўлиши мумкинлиги ва ҳарбий операция режим ўзгаришига қай даражада туртки беришини кенг қамровли кўриб чиққан.

Учинчи манбанинг сўзларига кўра, ҳокимиятни Ислом инқилоби қўриқчилари корпуси вакиллари қўлга олиши кўплаб эҳтимолий сценарийлардан бири. АҚШ Марказий разведка бошқармаси бу борада изоҳ беришдан бош тортган.

Эслатиб ўтамиз, аввалроқ “Reuters” исроиллик юқори лавозимли шахсга таяниб, Оятуллоҳ Али Хоманаий ўлдирилгани, унинг жасади топилиб, сурати Исроил Бош вазири Биньямин Нетаньяхуга кўрсатилгани ҳақида хабар берган эди.

АҚШ–Исроил–Эрон уруши

Бугун, 28 февраль куни Исроил кутилмаган вақтда Эронга қарата ҳаводан зарбалар йўллади. Ушбу зарбалар Эроннинг муҳим объектлари – Президент қароргоҳи, давлат идоралари ва ядро иншоотларига теккани иддао қилинмоқда. Эроннинг “Mehr” ахборот агентлиги Теҳрондаги Эрон разведка биносига ҳам ҳужум қилинганини ёзган. Исроил томонидан старт берилган операция “Еҳуда қалқони” деб номланган. Дастлабки манбаларга кўра, Эронга ўттиздан ортиқ ракеталар йўлланган бўлиши мумкин.

Орадан бироз вақт ўтиб Исроил Мудофаа кучлари Эронга ҳужумни расман тасдиқлаган. Шунингдек, Мудофаа вазирлиги Исроил фуқароларидан хавфсиз жойга яширинишни сўраган. Мамлакатда шошилинч равишда фавқулодда ҳолат эълон қилинган.

Шу орада АҚШ Президенти Дональд Трамп Эрон бўйича операциялар ҳақида 8 дақиқалик баёнот берган ва унда Эронга қилинган ҳужумда АҚШнинг иштирок этганини тасдиқлаган. Унинг қайд этишича, Эронга қилинган ҳарбий опреациялар Америка халқини ҳимоя қилиш учун амалга оширилмоқда. У ўз баёнотида эронликларни амалдаги тузумни ағдаришга чақирган. Трамп Эрон ҳарбий хизматчиларига таслим бўлишни ва бунинг эвазига «иммунитет» олишни таклиф қилди ёки “муқаррар ўлим”ни танлашлари мумкинлигини айтган.

Қолаверса, барча воқеаларни бир четдан кузатиб турган Эрон собиқ валиаҳд шаҳзодаси Ризо Паҳлавий ҳам Эрон халқига мурожаат қилиб, мамлакат учун ҳал қилувчи лаҳзалар келганини таъкидлаган. Шунингдек, у бу сўнгги жанг эканини ва унфда Эрон халқи Ислом Республикаси тузуми устидан ғалаба қозонишини таъкидлаган.

Орадан кўп вақт ўтмай энди Эрон Исроил давлати ҳудудига қарата зарба йўллашни бошлади.

Исроил Бош вазири Биньямин Нетаньяху ҳам ҳужумларни тасдиқлаб, баёнот берган. Унга кўра, Исроил ва АҚШнинг Эронга қарши қўшма операцияси Эрон террор режими келтириб чиқараётган таҳдидни бартараф этишга қаратилган. Нетаньяху махсус мурожаатида сўнгги 47 йил давомида Эрон раҳбарияти Исроил ва АҚШга қарши очиқ таҳдидлар қилган ҳамда минтақада зўравонлик сиёсатини юритганини айтган.