Киев Оқ уйнинг Украина бўйича режасини “муваффақиятсиз” деб ҳисобламоқда

АҚШнинг Украинани Россия билан ўт очишни тўхтатиш бўйича келишувдан кейин сайлов ўтказишга чақириши “муваффақиятсиз режа” каби кўринади. Бу ҳақда Украина Президенти Владимир Зеленскийнинг алоқа бўйича маслаҳатчиси Дмитрий Литвин кеча, 2 февраль куни “Reuters” агентлигига йўлаган жавоб хатида маълум қилди.

Литвинга кўра, Киев Вашингтон позицияси ҳақида қўшимча маълумот талаб қилади.

Қайд этиш жоиз, Президент Дональд Трампнинг Украина бўйича махсус вакили Кейт Келлог “Reuters”га берган интервьюсида Киев яқин ойларда Россия билан ўт очишни тўхтатиш бўйича музокаралар ўтказа олса, Қўшма Штатлар Украинада сайловлар йил охиригача ўтказилишини исташини маълум қилганди.

“Биз жаноб Келлогнинг тўлиқ интервьюсини кўрмадик, сайловга оид бир нечта иқтибослар, шунинг учун унинг позициясини тўлиқ баҳолаш қийин. Аммо агар унинг режаси фақат ўт очишни тўхтатиш ва сайловлардан иборат бўлса, бу муваффақиятсиз режадир – Путинни фақат шу икки нарса қўрқитмайди”, деди Литвин “Reuters” агентлигига ёзма жавобида. 

Литвиннинг айтишича, Украина асосий ҳамкорларининг расмий шахслари томонидан масалага чуқурроқ ёндашувни кўришни хоҳлайди.

“Аммо биз эслаймизки, Президент Трамп Президент Зеленский билан учрашувларида вазиятни ҳамда аслида Путинга босим ўтказиши мумкин бўлган нарсаларни чуқур ва оқилона муҳокама қилган”, деди у.

Билдирилишича, Украина Трампнинг позициясини ва унинг “куч позициясидан тинчлик” ёндашувини қадрлайди, чунки Киев мустаҳкам ва барқарор тинчликка шарт-шароит яратиш учун зарур бўлган ёрдамни олишга ҳаракат қилмоқда. Литвин “жамоалар ўртасида урушни тугатиш ва мустаҳкам тинчликни таъминлаш бўйича аниқ режа бўйича ҳақиқий иш”га тезда ўтиш муҳимлигини айтди.

Қайд этиш жоиз, Киев Москванинг келажакда яна босқин бошлашига тўсқинлик қиладиган хавфсизлик кафолатларисиз ўт очишни тўхтатишни истамаслигини бир неча бор айтган.

Маълумот учун, Россия 2022 йилда бостириб кирганидан кейин Украина жорий қилган ҳарбий ҳолатга кўра, ҳозирда сайловлар тақиқланган.