КХДР ҳарбий мақсадда 2 та қишлоқни бузиб ташлади

Шимолий Корея ўзининг ракета ва сунъий йўлдошларни учиришга мўлжалланган асосий объектларидан бири яқинидаги бир нечта аҳоли пунктини вайрон қилган бўлиши мумкин, бу эса инфратузилмани кенгайтириш режаларидан далолат беради. Бу ҳақда “Bloomberg” хабар берди.

Қайд этилишича, бу ҳолат минтақадаги хавфсизлик борасидаги хавотирларни кучайтирмоқда, айниқса, Эрондаги чўзилган уруш туфайли юзага келган умумий беқарорлик фонида.

“Stimson” маркази қошидаги “38 North” дастури маълумотларига кўра, март ойида мамлакатнинг ғарбий соҳилидаги, “Сохе” сунъий йўлдош учириш станцияси билан чегарадош бўлган иккита қишлоқ бузиб ташланган. Гап жами юзлаб бинолар ҳақида бормоқда.

Марказнинг катта илмий ходими Мартин Уильямс ушбу ҳаракатлар мамлакатнинг коинот дастурини ривожлантириш режалари билан боғлиқ бўлиши мумкинлигини таъкидлаган. Унинг сўзларига кўра, сунъий йўлдошлар ва сунъий йўлдошларга қарши технологиялар янги беш йиллик режага киритилганини ҳисобга олса, КХДРнинг асосий космик маркази кенгайтирилиши эҳтимолдан холи эмас.

“Шимолий Корея февраль ойида ўзининг янги ривожланиш стратегиясини тақдим этди – ҳужжат 2030 йилгача бўлган даврни қамраб олади ва хусусан, орбитага қўшимча разведка сунъий йўлдошларини учиришни назарда тутади. Ушбу ҳисоботнинг пайдо бўлиши КХДРнинг стратегик зарба бериш имкониятларини кучайтириши кутилаётган янги қаттиқ ёқилғили двигатель синовлари ҳақидаги хабари билан бир вақтга тўғри келди. Мамлакат ядро ва ракета дастурларини фаол ривожлантирмоқда, унинг етакчиси Ким Чен Ин эса Украинага қарши уруш фонида Россия билан тобора яқинлашмоқда”, дейилади хабарда.

Расман синов ўтказилган жой очиқланмаган, бироқ “38 North” таҳлилчилари давлат ОАВлари томонидан эълон қилинган суратларга таяниб, улар айнан “Сохе” полигонида бўлиб ўтганини тахмин қилмоқда.

КХДР баёнотига кўра, янги двигатель аввалги версиясидан тахминан 20 фоизга кучлироқ. Эҳтимол, у қитъалараро баллистик ракеталар учун мўлжалланган. АҚШ Давлат департаментининг собиқ ходими Венн Ван Дипенга кўра, тортиш кучининг оширилиши оғирроқ фойдали юкларни, хусусан, агар Шимолий Корея уларни ишлаб чиқа олса, бир нечта жанговар каллакларни учиришга қаратилган бўлиши мумкин.

Тончхан-ри номи билан ҳам машҳур бўлган полигоннинг эҳтимолий кенгайтирилиши, сўнгги пайтларда кескинлик кучайиб бораётган минтақадаги хавфсизлик борасидаги хавотирларни янада оширади.

Эслатиб ўтамиз, аввалроқ Шимолий Корея ер усти шароитида модернизация қилинган қаттиқ ёқилғили ракета двигателини синовдан ўтказганди. Бу двигатель АҚШ материк қисмига зарба бера оладиган қитъалараро баллистик ракеталарда қўлланиши мумкин.