“Коинот гўзали – 2025” ғолибаси аниқланди (видео)

Бугун, 21 ноябрь куни Таиландда “Miss Universe – 2025” (“Коинот гўзали”) халқаро гўзаллик танловининг якуний босқичи бўлиб ўтди ва мексикалик Фотима Бош ғолибликни қўлга киритди. Бу ҳақда танловнинг расмий саҳифаларида эълон қилинди.

Дунёнинг энг гўзал қизи тожини унга 2024 йилги “Miss Universe” соҳибаси, даниялик Виктория Тейлвиг топширган. Биринчи вице-мисс деб Таиланд вакиласи эълон қилинган. Учинчи, тўртинчи ва бешинчи ўринлар эса Венесуэла, Филиппин ва Кот-д’Ивуардан бўлган иштирокчиларга насиб этган. Танлов Бангкокдаги IMPACT кўргазма ва конгресс марказида ўтказилган.

Фотима Бош ғалабасидан сўнг баёнот берган.

“Мен ушбу тожни бошимда кўтариб юриб, зулмат бўлган жойларга нур олиб боришни, қизлар ва аёлларга ўз овозининг кучига ишониш учун илҳом беришни истардим. Аммо энг аввало, улар бугун қандай бўлсалар, шундайлигича етарли эканликларига ишонишсин”, дейди у.

Янги “Miss Universe” ўз шахсий ҳаёти ҳақида ҳам гапирган.

“Менинг йигитим йўқ. Севги кутиши мумкин”, дейди Фотима жилмайиб.

Фотиманинг бўйи 1,74 метр, ёши 25 да. У Иберо-америка университетида либослар дизайни ва мода йўналишида бакалавр даражасини олган.

Эслатиб ўтамиз, аввалроқ “Miss Universe-2025” финали арафасида катта можаро юз бергани ҳақида хабар берилганди. Тайёргарлик тадбирлари вақтида танлов ташкилотчиларидан бири – таиландлик тадбиркор Нават Ицарагрисил Фотима Бошнинг ҳомийлик фотосессиясида иштирок этмагани учун уни омма олдида танқид қилган ва қизни “аҳмоқ” деб атаганди. Ицарагрисил эса бу сўзни ишлатмаганини иддао қилди. Можаро вақтида у Бошни хонадан чиқариб юбориш учун қўриқчиларни чақирди, бунга норозилик сифатида яна бир нечта иштирокчи хонани тарк этди. 

Бу воқеани танловнинг яна бир ташкилотчиси – мексикалик бизнесмен ва Miss Universe Organization президенти Раул Роча Канту қоралади. Таиландлик тадбиркор эса танлов жараёнидан четлаштирилди.

“Bloomberg”нинг ёзишича, Канту ва Ицарагрисил ўртасида танловга бўлган турли ёндашувлар сабабли умумий келишмовчиликлар ҳам мавжуд бўлган. Таиландлик бизнесмен танловни реклама ва инфлюэнсерларга таянган ҳолда, кўнгилочар, даромад келтирадиган тадбирга айлантирмоқчи бўлган, Канту эса бу ёндашувни рад этиб, “Miss Universe” аёлларнинг имкониятларини кенгайтиришга хизмат қиладиган платформа бўлиб қолишини истаган.