Лука Модрич 5-марта Жаҳон чемпионатида иштирок этади

Кеча, 14 ноябрь оқшомида ўтган Жаҳон чемпионати саралаш босқичининг “Л” гуруҳи учрашувида Хорватия Фарер ороллари устидан 3:1 ҳисобида ғалаба қозониб, мундиал йўлланмасини қўлга киритди.

Риекада бўлиб ўтган учрашувда мезбонларга дуранг ҳам кифоя бўлар эди. Бироқ 16-дақиқада Геза Давид Тури голи эвазига Фарер оролларини ҳисобда олдинга олиб чиқди. Шунга қарамай, Хорватия тезда ўзига келди. 23-дақиқада Йошко Гвардиолнинг йўллаган кучли зарбаси билан ҳисобни тенглаштирди.

Иккинчи бўлимда эса Хорватия ўйинни тўлиқ назорат қилди. 2 йиллик танаффусдан сўнг терма жамоага қайтган Петар Муса 57-дақиқада Йосип Станишичнинг аниқ узатмасидан сўнг Хорватияни олдинга олиб чиқди. 70-дақиқага келиб Иван Перишич чап қанотдан берган узатмани Никола Влашич дарвозага йўллаб, ҳисобни ишончли кўринишга келтирди.

Ушбу ғалаба Хорватия сардори Лука Модрич учун тарихий аҳамиятга эга бўлди. У 40 ёшида ўзининг бешинчи Жаҳон чемпионатида майдонга тушади.

Фарер ороллари учун эса бу “Л” гуруҳидаги сўнгги ўйин бўлди. Улар якунда Чехиядан ортда қолган ҳолда турнирни якунлади. Гуруҳда иккинчи ўринни эгаллаган жамоа эса АҚШ, Канада ва Мексикада бўлиб ўтадиган ЖЧ–2026 плей-офф босқичига йўл олади. Шу тариқа, ЖЧга йўл олган жамоалар сони 30 тага етди. Яна 18 та йўлланма қолди.

Эслатиб ўтамиз, аввалроқ Франция терма жамоаси Жаҳон чемпионати саралаш босқичида Украинани 4:0 ҳисобида мағлуб этиб, кетма-кет саккизинчи бор мундиал йўлланмасини қўлга киритган эди.