Лула Путинни Истанбулга боришга кўндирмоқчи

north_east

Путин Зеленский билан учрашишга журъат эта олмайди – Каллас

Бразилия президенти Луис Инасиу Лула да Силва Россия Президенти Владимир Путинни Истанбулда Украина билан режалаштирилган тинчлик музокараларида иштирок этишга шахсан кўндириш ниятида эканини айтди. Бу ҳақда у бугун, 14 май куни Пекинда журналистларга маълум қилди.

Лула да Силва Хитойдан Бразилияга қайтаётганда Москвада тўхтайди ва Путин билан “суҳбатлашишга ҳаракат қилади”.

“Ҳой, ўртоқ Путин, Истанбулга бориб, музокаралар олиб бор, деб айта оламан”, деди Бразилия етакчиси.

Бразилия раҳбари Пекинда Лотин Америкаси давлатлари вакилларининг Хитой раиси Си Цзиньпин билан учрашувида иштирок этди. Лула да Силва ва Си Цзиньпин қўшма баёнотида тўғридан тўғри музокаралар Украинадаги урушни тугатишнинг “ягона йўли” эканини таъкидлади.

Россия Президенти матбуот котиби Дмитрий Песков Путин ва Лула да Силва ўртасидаги эҳтимолий алоқаларни изоҳлар экан, “бу ҳақда ҳозирча ҳеч нарса дея олмаслиги”ни билдирди.

“Агар алоқалар ҳар қандай шаклда келишилган бўлса, биз сизни дарҳол хабардор қиламиз”, деди бугун Кремль вакили.

Украина Ташқи ишлар вазири Андрей Сибига Бразилиядан 30 кунлик ўт очишни тўхтатиш ташаббусини қўллаб-қувватлашни ҳамда 15 май куни Путин ва Украина етакчиси Владимир Зеленский ўртасидаги тўғридан тўғри учрашувни ташкил этишга кўмаклашишни сўраган.

“Президент Зеленский Туркияда Путин билан учрашишга тайёрлигини тасдиқлади ва Бразилияни ушбу тўғридан тўғри саммит бўлиб ўтишини таъминлаш учун Россия билан мулоқотда ўзининг нуфузли овозидан фойдаланишга чақирди, деб ёзди Сибига 13 май куни Х ижтимоий тармоғида.

Путин Зеленскийнинг Истанбулда шахсий учрашув ўтказиш таклифига ҳозирча жавоб қайтармади – гарчи бу шаҳарда 2022 йилда бўлиб ўтган Россия-Украина музокаралари ғояси Россия томонидан илгари сурилган бўлса ҳам.