Мессининг жароҳат олгани тасдиқланди

“Интер Майами” жамоаси ҳужумчиси Лионель Мессининг мушакларидан жароҳат олгани тасдиқланди. Бу ҳақда клуб матбуот хизмати хабар берди.

Аргентиналик футболчи кеча, 25 май куни “Филадельфия Юнион”га қарши кечган ва 6:4 ҳисобида якунланган баҳсда жисмоний ноқулайлик туфайли алмаштирилганди. Тиббий текширувлар натижасида, 38 ёшли футболчининг чап сон мушакларида чарчоқ билан боғлиқ енгил чўзилиш аниқланган. Клуб унинг тикланиш муддати бўйича кейинроқ қўшимча маълумот беришини маълум қилди.

Амалдаги Жаҳон чемпионлари Аргентина терма жамоаси ҳали АҚШ, Канада ва Мексикада бўлиб ўтадиган Жаҳон чемпионати учун якуний таркибни эълон қилганича йўқ. Лотин Америкаси вакиллари мусобақада “Ж” гуруҳидан ўрин олган бўлиб, Жазоир, Австрия ва Иорданияга қарши майдонга тушади.

Маълумот учун, Лионель Месси 2022 йилги Жаҳон чемпионатида 7 та гол уриб, мусобақанинг “Кумуш бутса” мукофотини қўлга киритган эди. Аргентина финалда Францияни пенальтилар сериясида 4:2 ҳисобида мағлуб этиб, жаҳон чемпионлигини қўлга киритган.