Миллионлаб мухлислар Мбаппенинг “Реал”дан кетишини талаб қилмоқда

“Реал Мадрид” мухлислари франциялик ҳужумчи Килиан Мбаппенинг клубни тарк этишини талаб қилиб петиция бошлади. Қисқа вақт ичида ушбу петиция катта резонансга сабаб бўлди – атиги бир кун ичида 12 миллиондан ортиқ имзо тўпланди.

Манбага кўра, мазкур петиция кеча, 5 май куни бошланган ва ҳозирги кунга келиб петицияни имзолаганлар сони 12,2 миллиондан ошган. 

Маълум бўлишича, Мбаппенинг онаси ва айни пайтда унинг агенти ҳисобланган Файза Ламари “Реал Мадрид” президенти Флорентино Пересга ультиматум қўйишни режалаштирган. Унга кўра, Ламари клубдан Винисиус Жуниорнинг кетишини талаб қилмоқчи.

Манбаларга кўра, Мбаппе Винисиус ва жамоадаги айрим футболчилар томонидан хиёнатга учрагандек ҳис қилмоқда. Бироқ ҳозирча на клуб, на футболчиларнинг вакиллари ушбу маълумотни расман тасдиқлаган. Маълумотларга кўра, футболчилар Мбаппенинг “Барcелона”га қарши бўлажак ўйин олдидан севгилиси билан Италияга қилган сафаридан норози бўлмоқда.

Маълумот учун, Мбаппе 2024 йилдан бери “Реал Мадрид” сафида ўйнаб келмоқда. Жорий мавсумда у “қироллик клуби” сафида 41 та ўйинда 41 та гол урди.