Мухлислар норозилиги сабаб Боатенг “Бавария”га қайтмайдиган бўлди

“Бавария” клуби собиқ ҳимоячиси Жером Боатенгнинг Венсан Компани қўл остида ёрдамчилик қилиш режасидан воз кечди. Бу қарор мухлисларнинг собиқ футболчининг илгари судлангани туфайли билдирган норозилиги фонида қабул қилинган. Бу ҳақда “Goal” нашри хабар берди.

Боатенг аслида ўзининг мураббийлик фаолиятини “Бавария”да бошлашни режалаштирганди. Клуб унга А лицензия сертификати учун зарур бўлган қисқа муддатли амалиёт қилиш имкониятини берган, Венсан Компани эса собиқ жамоадошининг тажрибасидан фойда олишдан мамнун бўлган. Аммо ташаббус кутилмаганда жамоа мухлислари орасида норозилик тўлқинини келтириб чиқарган.

“Альянц Арена”да ва ижтимоий тармоқларда “Бавария”да зўравонликка жой йўқ” деган шиорлар кўтарилган. Мухлисларнинг босими ортидан клуб ва футболчи амалиётни бекор қилиш ҳақида келишиб олган.

Маълумот учун, Боатенг атрофидаги можаро 2018 йилда собиқ рафиқаси Шерин Сенлерга нисбатан зўравонлик айбловлари билан бошланган. У айбловларни рад этган бўлса-да, 2021 йилда Мюнхен суди уни 1,8 миллион евро жаримага тортган, кейинчалик бу миқдор 200 минг еврогача камайтирилган. Суд, шунингдек, футболчига 100 минг еврони хайрия ишларига йўналтириш мажбуриятини юклаган.

Гарчи, иш қамоқ жазосисиз якунланган бўлса-да, можаро футболчининг обрўсига жиддий зарар етказган. Бу воқеа унинг “Бавария”га қайтиш режасини барбод қилган. Боатенг 2011-2021 йиллар оралиғида “Бавария” сафида 300 дан ортиқ ўйин ўтказган, тўққиз карра Германия чемпиони ва икки марта Чемпионлар лигаси ғолиби бўлган.

Эслатиб ўтамиз, аввалроқ Германия терма жамоаси сафида 2014 йилги Бразилияда бўлиб ўтган Жаҳон чемпионатида ғолиб бўлган 37 ёшли Жером Боатенг профессионал футболчилик фаолиятини якунлагани ҳақида хабар берилган эди.