Надаль “Реал” президентлигига номзодини қўядими?

Дунёнинг собиқ биринчи ракеткаси Рафаэль Надаль ижтимоий тармоқларда “Реал Мадрид” футбол клуби президенти лавозимига номзодини қўйиш ҳақидаги хабарлар ёлғон эканлигини айтди. Бу ҳақда у AS нашрига берган интервьюсида маълум қилди.

Аввалроқ, Мадрид клуби президенти Флорентино Пéрес муддатидан олдин сайловлар ўтказилишини эълон қилиб, номзодларни ўз дастурларини тақдим этишга чақирган эди.

Маълумотига кўра, Cox Energy раҳбари, бизнесмен Энрике Рикельме Вивес Переснинг асосий рақибига айланиши мумкин.

Шунингдек, Надаль номзодлардан бирини қўллаб-қувватлаши мумкинлиги ҳақида хабарлар тарқалган.

Бундан ташқари, маҳаллий ОАВлар Надалнинг теннисдаги фаолиятидан кейинги ҳаёти ўзи мухлислик қиладиган “Реал Мадрид” билан боғлиқ бўлиши мумкинлигини таъкидлаган. Шунингдек, Надалнинг ўзи ҳам журналистларнинг бу ҳақдаги саволларига “агар имкони бўлса, бир кун келиб “Реал Мадрид” президенти бўлишни хоҳлардим”, дея жавоб берган.

Маълумот учун, “Реал Мадрид”нинг жорий мавсумдаги бир қатор муваффақиятсиз натижаларидан сўнг клубда президентлик сайлови ўтказилиши режалаштирилган. Шунингдек, жамоа бош мураббийи ҳам ўзгариши кутилмоқда. Сўнгги маълумотларга кўра, португалиялик мутахассис Жозе Моуриньо ушбу лавозим учун асосий фаворитлардан бири бўлиб турибди.