PKK ўзини ўзи тарқатиб юборди

Туркияда тақиқланган Курдистон ишчи партияси (PKK) террор ташкилоти қуролли можарони тўхтатиш ва ўзини тарқатиб юборишга қарор қилгани ҳақида баёнот тарқатди. Бу ҳақда “Rudaw” хабар берди.

Маълум қилинишича, ушбу қарор жорий йилнинг 5-7 май кунлари бўлиб ўтган 12-партия қурултойида қабул қилинган.

Якуний декларациясида айтилишича, “съезд PKK ташкилий тузилмасини тарқатиб юбориш ва қуролли курашни тўхтатиш, шу билан PKK деб номланган ташкилот фаолиятига чек қўйиш тўғрисида қарор қабул қилган”.

Шунингдек, партия курашнинг сиёсий ва демократик усулларига ўтилганини эълон қилган ва халқаро ҳамжамиятдан ёрдам сўраган.

Бундан ташқари, ўзини ўзи тарқатиб юборган террорчилик ташкилоти Туркия расмийларини ҳибсга олинган етакчиси Абдулла Ўжалонга ҳуқуқий ва сиёсий кафолатлар беришга чақирган.

Маълумот учун, Курдистон ишчи партияси 1978 йил 27 ноябрда чап социалистик партия сифатида ташкил этилган ва 1984 йил 15 августдан бошлаб Туркия ҳукуматига қарши қуролли урушни бошлаган. Унинг тарафдорлари Абдулла Ўжалонни олий етакчи ва мафкуравий илҳомлантирувчи деб билади.

Туркия, АҚШ, Европа Иттифоқи ва айрим бошқа давлатлар PKK'ни террорчи ташкилот деб тан олган.

Абдулла Ўжалон 1999 йилдан бери Имрали оролидаги қамоқхонада изоляцияда сақланиб келинмоқда. У жорий йилнинг 27 февраль куни тарихий баёнот бериб, тарафдорларини Туркия давлатига қарши 40 йилдан ортиқ давом этган курашдан сўнг қуролларини ташлаб, PKK тарқатилганини эълон қилишга чақирди. Бу ҳаракат 40 мингдан ортиқ одамнинг ўлимига сабаб бўлган можарода тинчликка йўл очишга қаратилган эди.

Эслатиб ўтамиз, аввалроқ Туркияда тақиқланган Курдистон ишчи партияси (PKK) террор ташкилоти ўз етакчиси Абдулла Ўжалоннинг чақириғига жавобан Анқара билан сулҳ эълон қилган эди. Шундан сўнг Туркия Курдистон Ишчилар партиясига алоқадор гуруҳларни зўравонликдан воз кечишга ва қуролларни ташлашга чақирган эди.