Полина Кудерметова “Australian Open”даги иштирокини якунлади

Бугун, 21 январь куни теннис бўйича Ўзбекистон терма жамоасининг аъзоси Полина Кудерметова “Катта Дубулға” туркумига кирувчи Австралия очиқ чемпионатидаги иштирокини якунлади. Кудерметова турнирнинг иккинчи даврасида даниялик рақибасига мағлуб бўлди.

Австралиянинг Мельбурн шаҳрида давом этаётган “Катта Дубулға” туркумига кирувчи “Australian Open” турнири яккалик баҳсларда иштирок этаётган ўзбекистонлик Полина Кудерметова иккинчи давра доирасида даниялик 23 ёшли Клара Таусонга қарши кортга чиқди.

1 соат 53 дақиқа давом этган баҳсда Кудерметова 3/6, 6/3, 5/7 ҳисобларида имкониятни бой берди ва мусобақадаги иштирокини якунлади.

Маълумот учун, 22 яшар Полина Кудерметова Австралия очиқ чемпионатининг дастлабки даврасида Испания вакиласи Гийомар Маристанидан устун келган эди. Дунёнинг 14-рақамли ракеткаси бўлмиш Клара Таусон эса биринчи босқичда венгриялик Далма Галфини мағлуб этганди.

Эслатиб ўтамиз, жорий йилнинг 19 январь куни Ўзбекистон терма жамоасининг яна бир аъзоси Камилла Раҳимова “Australian Open” биринчи даврасида дунёнинг учинчи ракеткаси, америкалик Коко Гоффга роппа-роса 100 дақиқа давом этган баҳсда 6/2, 6/3 ҳисобида имкониятни бой бериб, мусобақадаги иштирокини якунлаган эди.