Путин Истанбулда америкаликлар билан учрашган Дарчиевни АҚШга элчи этиб тайинлади

Россия Президенти Владимир Путин Украина ва Европа давлатларини ҳайратда қолдирган яқинлашувга раҳбарлик қилиш учун бугун, 6 март  куни Ғарбни оммавий қоралаши билан танилган фахрий дипломат Александр Дарчиевни АҚШга элчи этиб тайинлади.

Россия Ташқи ишлар вазирлиги ўтган ҳафта Туркияда Россия ва АҚШ расмийлари ўртасида бўлиб ўтган учрашувда Вашингтон ҳозирда вазирликнинг Шимолий Америка бўлими бошлиғи лавозимида ишлаб келаётган Дарчиевни тайинлаш учун яшил чироқ ёққанини айтди. 27 февраль куни Истанбулда бўлиб ўтган олти соатлик йиғилишда делегациялар ўз элчихоналарини йиллар давомида ҳайдаб чиқаришдан кейин нормал фаолиятни тиклашга ҳаракат қилди, бу икки давлат ўртасидаги музлари эришининг сўнгги белгиси эди.

Президент Дональд Трамп Украинадаги уруш бўйича аввалги сиёсатни ўзгартирди, ўтган ҳафта Оқ уйда Украина Президенти Владимир Зеленский билан тўқнашганидан кейин Москва билан икки томонлама музокараларни бошлади ва Киевга ҳарбий ёрдамни тўхтатди.

Ўтган октябрь ойида аввалги элчи Анатолий Антонов ўз лавозимини тарк этганидан бери Россиянинг Вашингтонда элчиси йўқ эди.

Маълумот учун, 64 ёшли Дарчиев икки марта Россиянинг Вашингтондаги элчихонасида хизмат қилган ва 2014 йилдан 2021 йилгача Канададаги элчи бўлган. Бошқа юқори мартабали россиялик дипломатлар сингари у сўнгги йилларда АҚШ ва Ғарбни кескин қоралашлари билан танилган.

“Афтидан, Вашингтонга ўз гегемонлиги ўтмишда қолганига кўникиш учун вақт керак бўлади ва ўз таъсир доирасига ва масъулиятига эга бўлган Россиянинг миллий манфаатлари билан ҳисоблашишига тўғри келади”, деган у 2022 йил мартида “Интерфакс”га.

Ўша пайтдаги президент Жо Байден даврида АҚШнинг Россиядаги элчиси бўлган Жон Салливан ўз хотираларида Байден Путинни ҳарбий жиноятчи деб атагандан кейин Москвадаги Ташқи ишлар вазирлигидаги учрашувда Дарчиевнинг “кўзга кўринарли даражада ғазабланганини” тасвирлаган.

“Мен тугатганимдан сўнг, у менга бундай жанговар муносабат билан вазирликка кирмаслигим керак, деб бақирди”, деб ёзади Салливан.

Эслатиб ўтамиз, 27 февраль куни Истанбулдаги АҚШ Бош консуллигида Россия-АҚШ музокаралари бўлиб ўтганди. Америка делегациясига АҚШ Давлат котиби ёрдамчиси ўринбосари Соната Коултер, Россия делегациясига эса Ташқи ишлар вазирлиги Шимолий Атлантика департаменти директори Александр Дарчиев бошчилик қилди.