Путин урушни давом эттириш ниятида – “Reuters”

Россия Президенти Владимир Путин Ғарб тинчлик ўрнатиш учун қўйган шартларни инобатга олган ҳолда Москва билан ўзаро муносабатларни бошламагунча Украинадаги урушни тўхтатмоқчи эмас. Бу ҳақда кеча, 15 июль куни Кремлга яқин учта манбага таяниб, “Reuters” агентлиги хабар берди.

Қайд этилишича, Россия етакчиси АҚШ Президенти Дональд Трампнинг Москвага нисбатан санкцияларни кучайтиришга тайёрлиги ҳақидаги баёнотини инобатга олмайди. Қолаверса, рус қўшинлари олдинга силжиши билан Путиннинг ҳудудий талаблари кенгайиши мумкин.

Агентлик суҳбатдошларига кўра, Владимир Путин Россия иқтисодиёти ва қуролли кучларини Ғарбнинг кейинги чекловчи чораларига дош бера оладиган даражада кучли, деб ҳисоблайди.

Унинг фикрича, Россия кейинги иқтисодий қийинчиликларни, жумладан, Вашингтон томонидан Россия нефтини харидорларга божлар жорий этиши мумкин бўлган вазиятни енгиб ўтишга қодир, дея таъкидлайди агентлик суҳбатдошлари.

“Путиннинг фикрича, ҳеч ким, жумладан америкаликлар ҳам у билан Украинада тинчлик йўли билан келишув тафсилотларини жиддий муҳокама қилмаган, шунинг учун у ўзи хоҳлаган нарсага эришмагунча музокараларни давом эттиришга бел боғлаган”, дейди “Reuters” манбаларидан бири.

Агентликнинг эслатишича, Путин НАТОни шарқда кенгайтирмаслик, Украинанинг бетарафлиги, русийзабон аҳоли ҳуқуқларини ҳимоя қилиш ва Украинанинг аннексия қилинган бешта вилоятини Россия таркибига киритиш бўйича қонуний мажбуриятларни талаб қилмоқда.

“Шу билан бирга, у Украина хавфсизлиги кафолатларини муҳокама қилишга тайёр”, деб ёзади “Reuters” нашри.

Трампнинг ультиматуми ва Москванинг муносабати

14 июль куни АҚШ Президенти Дональд Трамп Владимир Путиннинг Украинада ўт очишни тўхтатиш бўйича келишувдан бош тортганидан ҳафсаласи пир бўлганини айтди. У Россияга Украина бўйича битим тузиш учун 50 кун муҳлат бераётгани ҳақида огоҳлантирди. Трампнинг сўзларига кўра, агар тинчлик келишувига эришилмаса, АҚШ Россиянинг савдо ҳамкорларига нисбатан 100 фоизлик иккиламчи тарифларни жорий қилади.

Бундан ташқари, Оқ уй раҳбари Европа давлатлари билан биргаликда Украинага ҳаво ҳужумидан мудофаа тизимлари, жумладан, Patriot тизимлари ҳамда кўп сонли қурол-яроғ ва бошқа ҳарбий техникалар етказиб беришга ваъда берди.

Россия Президентининг матбуот котиби Дмитрий Песков Трампнинг баёнотларини шарҳлар экан, улар “жуда жиддий” эканини таъкидлади. Песковнинг сўзларига кўра, Россия Президенти америкалик мавқедошининг сўзларига “агар зарур деб ҳисобласа” изоҳ беради.