Путиннинг ўқитувчисига ҳурмати дунёда намуна сифатида кўрсатилмоқда (видео)

Россия Президенти Владимир Путин ўз ўқитувчиси Вера Дмитриевна Гуревични Москвадаги Ғалаба парадига ташриф буюришга ва кейин бир неча кун меҳмон бўлишга таклиф қилди. Россия етакчисининг ўқитувчиси учун махсус маданий дастур ташкил этилди ва 11 май куни давлат раҳбари уни ўз қароргоҳига кечки овқатга таклиф қилди. Айни вақтда Путиннинг ўқитувчисига кўрсатган ҳурмати, у меҳмонхонадан Кремль саройига ўзи автомобиль бошқарганча олиб кетгани халқаро медиада диққат билан кузатилмоқда. 

Владимир Путиннинг таклифига биноан 9 май куни Ғалаба парадида унинг ўқитувчиси Вера Дмитриевна Гуревич иштирок этди. 

Вера Гуревич 92 ёшда. У ўрта мактабда Путиннинг синф раҳбари бўлган. Президент ўқитувчини ўзига энг кучли таъсир кўрсатган кишилар қаторида бир неча бор тилга олган ва у билан ҳалигача мулоқотда эканлигини айтган.

Кремль Россия президенти Владимир Путиннинг ўқитувчиси Вера Гуревич билан учрашуви тасвирларини эълон қилди, давлат раҳбарининг ўзи автомобилда уни олиб кетиш учун Москва марказидаги машҳур кўча – Арбатдаги меҳмонхонага борган.

Меҳмонхона биносига Путин “Аурус2 автомобилини ҳайдаб келган. У машинасини кираверишда тўхтатган. Одатда ҳамма жиддий иш костюмида кўришга ўрганиб қолган президент бу сафар жуда либерал кийинганди – жинси шим, катак кўйлак ва тўқ кўк куртка. У ўқитувчисига нафис пушти рангдаги улкан гулдастани ҳадя қилган. 

У ўқитувчиси учун орқа ўриндиқ эшигини авайлаб очган ҳолда уни автомобилга ўтқазиб, Кремль томон йўлга тушган. 

Кремль воизи Дмитрий Песковга кўра, Президент ўзининг биринчи ўқитувчисига жуда илиқ муносабатда. Улар доимо мулоқотда бўлиб туради.