Расман: Эрон ЖЧ-2026 да иштирок этади

Футбол бўйича Эрон миллий терма жамоаси 2026 йилги Жаҳон чемпионатида иштирок этиш учун тўлиқ тайёр. Бу ҳақда ҳукумат вакили Фотима Моҳажераний кеча, 22 апрель куни IRIB давлат телерадиокомпанияси орқали берган баёнотида сўз очди. 

Ёшлар ва спорт вазирлиги жамоанинг турнирда самарали иштирок этиши учун барча зарур чора-тадбирларни таъминлаганини маълум қилди.

Унинг айтишича, жамоанинг мусобақада самарали қатнашиши учун барча зарур шароитлар таъминланган. Расмийнинг сўзларига кўра, тайёргарлик ишлари Спорт вазирининг топшириғи асосида олиб борилган бўлиб, жамоанинг муваффақиятли иштироки учун керакли инфратузилма ва имкониятлар яратишга алоҳида эътибор қаратилган.

Қайд этиш жоиз, жорий йилнинг 16 апрель куни FIFA президенти Жанни Инфантино Эрон терма жамоаси яқинлашётган Жаҳон чемпионатида иштирок этиши кутилётганини айтган. У турнир 11 июньдан 19 июльгача давом этишини эслатиб, жамоа саралашдан ўтганини ва АҚШ-Исроилнинг Эронга қарши давом этётган урушига қарамай, ўйнаш истагини билдирганини таъкидлаган.

“Эрон албатта келиши керак, улар ўз халқини ҳимоя қилади, футболчилар ўйнашни хоҳлайди. Спорт сиёсатдан ташқарида бўлиши лозим”, дейди Инфантино.

АҚШ Президенти Дональд Трамп эса жорий йилнинг март ойида Эрон жамоаси мусобақада қатнашиши мумкинлигини айтган.

Режага кўра, Эрон ўзининг “G” гуруҳи доирасидаги учта ўйинини АҚШда ўтказади – иккитаси Лос-Анжелесда, биттаси Сиэтлда. Жамоанинг турнир учун базаси эса Аризона штатидаги Туксон шаҳрида жойлашади.

Эслатиб ўтамиз, Эроннинг ушбу йирик мусобақадаги иштироки 28 февраль куни АҚШ ва Исроил томонидан бошланган можаро сабаб шубҳа остида қолган ва расмийлар миллий ҳамда клуб спорт жамоаларига “душман” деб баҳоланган мамлакатларга сафар қилишни тақиқлан эди.

Ойбек Рустамов