Расман! Каннаваро Ўзбекистон МТЖ бош мураббийи этиб тайинланди

Ўзбекистон футбол ассоциацияси италиялик мутахассис Фабио Каннаваро билан шартнома тузди. Бу ҳақда ЎФА хабар берди.

Фабио Каннаваро 3 карра Жаҳон чемпионати иштирокчиси, 2006 йилги Жаҳон чемпионати ғолиби, яқин ўтмишнинг энг яхши ҳимоячиларидан бири, таниқли мутахассис бўлиб, энди у Ўзбекистон миллий терма жамоасини АҚШ, Канада ва Мексика майдонларида ўтадиган Жаҳон чемпионатига тайёрлайди.

Мураббийлар штабида Каннаварога қуйидаги мутахассислар ёрдам беради:

• Аужениё Албарелла — ёрдамчи мураббий (Япония терма жамоаси, “Ювентус”, “Удинезе” ва “Динамо Загреб”да ишлаган);
• Троизе Францеско — жисмоний тайёргарлик бўйича мураббий (“Беневенто”, “Удинезе” ва “Динамо Загреб”да фаолият юритган);
• Антонио Кименти — дарвозабонлар мураббийи (Италия ёшлар терма жамоаси, “Сампдориа” ва “Спал” клубларида ишлаган).

Маълумот учун, Фабио Каннаваро футболдаги фаолиятини якунлагач, Яқин Шарқ ва Хитой клубларини бошқарган. 2019 йилда у Хитой терма жамоаси бош мураббийи этиб тайинланган. 2022 йилдан 2023 йилгача Италиянинг “Беневенто” клуби бош мураббийи бўлиб ишлаган. 2024 йилнинг апрелида у “Удинезе” (Италия) жамоасини қабул қилиб олган ва бир муддат ишлаган.  Шундан сўнг, Каннаваро Хорватиянинг “Динамо Загреб” клубида ҳам бош мураббий сифатида фаолият юритган.

Эслатиб ўтамиз, аввалроқ Фабио Каннаваро мураббийлар штаби билан бирга Тошкентга етиб келгани ҳақида хабар берилган эди.