“Реал” юлдузлари жанжаллашгани учун ярим млн евро жаримага тортилди

Мадриднинг “Реал” клуби машғулот майдонида юз берган можаро сабаб француз футболчиси Орельен Тчуамени ва уругвайлик Федерико Вальвердега ҳар бирига 500 минг евро миқдорида жарима солди. Бу ҳақда клуб матбуот хизмати хабар берди.

Аввалроқ, Вальверде ва Тчоуамени жамоанинг машғулот базасида тортишиб қолгани ҳақида хабарлар тарқалди. Маълумотларга кўра, қоидабузарлик ортидан юзага келган баҳс футболчиларнинг бир-бирини итариши ва жанжаллашувига сабаб бўлган. Можаро эртанги кун ҳам давом этган ва навбатдаги ҳодиса “жуда жиддий” деб баҳоланган.

Жанжални тўхтатиш учун бир нечта футболчилар аралашган. Якунда Вальверде бошидан жароҳат олиб, шифохонага ётқизилган. Кейинчалик Мадриднинг “Реал” клуби футболчиларга нисбатан интизомий чоралар кўрилганини тасдиқлади ҳамда Вальверде жароҳати сабаб Каталониянинг “Барселона” клубига қарши учрашувни ўтказиб юборишини маълум қилди.

Бироқ Вальверденинг ўзи эса Тчуамени билан муштлашув бўлганини рад этди ва улар бир-бирига зарба бермаганини таъкидлади.

“Футболчилар содир бўлган воқеадан чуқур афсусда эканликларини билдириб, бир-биридан узр сўрашди. Шунингдек, улар клуб, жамоадошлари, мураббийлар штаби ва мухлислардан ҳам узр сўрашди. Ҳар икки футболчи клуб лозим деб топадиган исталган санкцияни қабул қилишга тайёр эканини маълум қилди. Мавжуд вазиятни инобатга олиб, Мадриднинг “Реал” клуби ҳар бир футболчига 500 минг евро миқдорида молиявий жарима қўллашга қарор қилди ва шу билан ички тартиб-таомиллар якунланди”, дейилади клуб расмий баёнотида.

Мадриднинг “Реал” клуби эртага, 10 май куни сафарда Каталониянинг “Барселона” клубига қарши майдонга тушади. Агар мадридликлар ушбу баҳсда очко йўқотса, “Барселона” муддатидан олдин Испания чемпионлигини қўлга киритади.