Роналду энг яхши ёш футболчини танлашдан бош тортди

Жорий йилнинг 22 сентябрь куни Ламин Ямаль кетма-кет иккинчи маротаба йилнинг энг яхши ёш футболчиси учун топшириладиган “Kopa Trophy” совринини қўлга киритди. Ушбу мукофот учун Лионель Мессининг қайси футболчиларга овоз бергани маълум бўлди. Криштиану Роналду эса овоз беришдан бош тортган. Бу ҳақда “Sports Illustrate” нашри хабар берди.

Ҳар йили “France Football” томонидан ўтказиладиган “Олтин тўп”ни топшириш маросимида 21 ёшгача бўлган энг яхши футболчига “Kopa Trophy” соврини берилади. Мазкур мукофот биринчи маротаба 2018 йилда эркаклар учун тақдим этилган ва 2024 йилдан бошлаб аёлларга ҳам топшириш анъанага айланган.

Соврин учун курашда Ямаль 124 очко тўплаб, биринчи ўринни эгаллади. Иккинчи поғонани ПСЖ билан Чемпионлар Лигасида ғолиб чиққан Дезире Дуэ 72 очко билан банд этган бўлса, Жоау Невеш ва Эстевао 23 очко билан учинчи ва тўртинчи ўринларга лойиқ кўрилди.

“Олтин тўп” ёки Лев Яшин кубогидан фарқли ўлароқ, “Kopa Trophy”соврини ғолибини фақатгина “Олтин тўп”ни қўлга киритган футболчиларгина аниқлаб беради. Уларнинг ҳар бири учта ўйинчини танлаб, беш, уч ва бир балл билан баҳолайди. Бу эса Лионель Месси ва Криштиану Роналду каби афсоналарга энг ёрқин ёш иқтидорни эътироф этиш имконини беради.

Месси “Барселона”нинг 18 ёшли истеъдод эгасига ишончини сақлаб қолган ҳолда 5 очкони Ямальга берди. У ПСЖ аъзоси Дуэни иккинчи ўринга қўйди ва сўнгги очкони “Ла Масия”нинг яна бир тарбияланувчиси Пау Кубарсига берди.

“Олтин тўп”ни рекорд даражада қўлга киритган Месси 2024 йилда ҳам худди шундай тарзда овоз берган. Бироқ Лионель Кубарсини иккинчи, “Манчестер Юнайтед” вингери Алехандро Гарначони эса учинчи ўринга жойлаштирган эди.

Роналду “Олтин тўп” совриндорлари орасида овоз бериш жараёнида иштирок этмаган кам сонли ғолиблардан бири бўлди. Манба маълумотларига кўра, португалиялик юлдуз билан бирга Англия афсонаси Кевин Киган ва Франция футболи рамзи Мишель Платини ҳам овоз беришдан бош тортган.

Бу қарор Роналдунинг яқинда билдирган фикрларига мос келади. У индивидуал футбол мукофотларига бўлган ишончини йўқотгани ва энди бу мукофотларни тан олмаслиги ҳақида айтган эди. Шундай бўлса-да, Месси сингари, у ҳам келажакда “Kopa Trophy” соврини учун овоз бериш ҳуқуқига эга бўлган сараланган гуруҳ аъзоси бўлиб қолади.

Маълумот учун, Ламин Ямаль “Олтин тўп” учун курашда 1059 очко билан Усмон Дембеледан кейин иккинчи ўринни эгаллаган эди.

Жаҳонгир Иномжонов