Россия Украинада энергетикларнинг автобусига зарба берди. Қурбонлар бор 

Кеча, 1 февраль куни Россия дронлари Украинанинг Павлоград туманидаги энергетика корхонаси ходимларини олиб кетаётган автобусга зарба берди. Ҳужум оқибатида 12 нафар ходим ҳалок бўлди, яна 16 киши жароҳатланди. Бу ҳақда Украина Энергетика вазирининг биринчи ўринбосари Артём Некрасов маьлум қилди.

Некрасовга кўра, Россия ҳужумлари нафақат энергетика инфратузилмасига, балки оддий фуқароларга ҳам очиқ зарар етказмоқда. Ҳужумлар оқибатида Харьков, Суми, Днепр ва Черкасси вилоятларида истеъмолчилар электр таъминотисиз қолган. Бундан ташқари, мураккаб об-ҳаво шароити сабабли Одесса, Николаев ва Кировоград вилоятларидаги 160 дан ортиқ аҳоли пунктлари ҳамон электрсиз қолмоқда.

“Душман ҳужумлари оқибатида зарар кўрган энергетика объектларида тиклаш ишлари давом этмоқда. Энергия тизимининг барқарор ишлашини таъминлаш учун барча чоралар кўрилмоқда”, деб баёнот берган Украина Энергетика вазирлиги. 

Эслатиб ўтамиз, аввалроқ АҚШ Президенти Дональд Трамп Россия Президенти Владимир Путин Киев ва Украинанинг бошқа шаҳарларига аномал совуқ ҳаво туфайли бир ҳафта давомида ҳужум қилмасликка рози бўлганини айтган эди. Мазкур ҳолат энергетик сулҳ масаласи фақат расмий тусда қолаётганини, амалда эса бошқа ишлар бўлаётганини кўрсатади.

Кремль бу келишувни тасдиқлаган. Бироқ, унинг муддатини 1 февралгача қисқартирган. Украина Президенти Зеленский эса Москва ва Киев ўртасида энергетик сулҳ бўйича тўғридан тўғри келишув бўлмаганини қайд этган. Унга кўра, Украина Россия энергетикасига ҳужум қилмасликка тайёр, бироқ бу қарор фақат бир тарафлама бўлмаслиги керак.

Суннатова Фарангиз