Салоҳ интервьюдан кейин жамоадошларидан узр сўради – Кëртис Жонс

“Ливерпуль” ярим ҳимоячиси Кëртис Жонс мисрлик ҳужумчи Муҳаммад Салоҳ яқинда берган интервьюсидан сўнг жамоадошларидан узр сўраганини маълум қилди. Бу ҳақда “Sky Sports” нашри хабар берди.

Жонс “Sky Sports” нашрига берган интервьюсида Салоҳ жамоа олдига чиқиб, ўз фикрларини тушунтирганини, ушбу ҳолат кийиниш хонасидаги муҳитга салбий таъсир кўрсатмаганини ва футболчилар ўртасида бирдамлик сақланиб қолганини таъкидлади.

“Салоҳ ўзига хос инсон ва у фикрини очиқ айта олади. У биздан узр сўраб, “Агар гапларим кимларгадир таъсир қилган ёки қандайдир ноқулай ҳис уйғотган бўлса, узр сўрайман”, деди. У айнан шундай инсон”, дейди Жонс.

Жорий йилнинг 6 декабрь куни “Ливерпуль”нинг “Лидс Юнайтед”га қарши ўйинидаги дурангдан сўнг 33 ёшли Салоҳ клуб ва бош мураббий Арне Слотни танқид қилган эди. Шундан сўнг мисрлик ҳужумчи “Ливерпуль”нинг Чемпионлар лигасидаги учрашувида таркибдан тушиб қолган эди.

Салоҳ кейинчалик жорий йилнинг 13 декабрь куни “Ливерпуль”нинг “Брайтон” устидан 2:0 ҳисобидаги ғалабасида захирадан майдонга тушиб, голли узатмани амалга оширди. Шундан сўнг у Африка Миллатлар Кубогида иштирок этиш учун терма жамоа ихтиёрига жўнаб кетди.

Амалдаги чемпион “Ливерпуль” ҳозирда Премьер-лига турнир жадвалида 26 очко билан 7-ўринда бормоқда ва пешқадам “Арсенал”дан 10 очко ортда қолмоқда.

Эслатиб ўтамиз, аввалроқ “Ливерпуль” ва Муҳаммад Салоҳ можароларидан сўнг Саудия Арабистони клублари январь ойида Салоҳни ўз сафига қўшиб олиш ҳаракатини бошлаган эди.