Самарқанд ёввойи табиат бўйича муҳим саммитга мезбонлик қилади

Ёввойи фауна ва флоранинг йўқолиб кетиш хавфи остида турган турлари билан халқаро савдо тўғрисидаги конвенция (CITES) Томонлар конференциясининг (COP20) 20-йиғилиши 24 ноябрдан 5 декабргача Самарқандда бўлиб ўтади. 

CITES Бош котиби Ивонн Игуэронинг сўзларига кўра, бўлажак йиғилишда 185 мамлакатдан тахминан 3000 делегат иштирок этиши кутилмоқда. Конференция Конвенция тарихидаги энг йирикларидан бири ва 2025 йилнинг энг муҳим ва асосий табиатни муҳофаза қилиш тадбирларидан бири бўлади. Тадбир доирасида, шунингдек, CITES Доимий қўмитасининг 79 ва 80-йиғилишлари ҳам бўлиб ўтади. 

“Самарқанд ёввойи табиатни муҳофаза қилиш билан шуғулланадиган барча шахслар учун марказга айланади. Бу ерда биз халқаро савдони қандай қилиб масъулиятли ва барқарор қилишни муҳокама қиламиз. Ўзбекистон яшил ривожланиш йўналишини танлаб, экологик сиёсат мамлакатнинг стратегик тараққиётининг бир қисми бўлиши мумкинлиги ҳақида намуна кўрсатмоқда”, дейди Бош котиб Ивонн Игуэро. 

Ўзбекистон томонининг сўзларига кўра, Самарқандда тадбирга кенг кўламли тайёргарлик ишлари олиб борилмоқда. Хусусан, 110 дан ортиқ эксперт семинарлари ва кўргазмалари, шунингдек, 114 та масалани қамраб олувчи тематик сессиялар режалаштирилган. Шунингдек, Конвенция қоидаларини янгилаш бўйича қарийб 150 та ҳужжат лойиҳаси ва 51 та таклиф тайёрланди.

Форум иштирокчилари Конвенцияни амалга ошириш механизмларини такомиллаштириш, ноёб ўсимлик ва ҳайвон турларини ҳимоя қилиш, табиий ресурсларни бошқариш ва халқаро ҳамкорликни мустаҳкамлаш масалаларини муҳокама қилишлари кутилмоқда. 

CITES Конвенцияси

Ёввойи фауна ва флоранинг йўқолиб кетиш хавфи остида турган турлари билан халқаро савдо тўғрисидаги Конвенция (CITES) 1973 йилда Вашингтонда имзоланган халқаро кўп томонлама шартнома бўлиб, у 1975 йил 1 июлда кучга кирган. CITES таркибига 184 та давлат ва Европа Иттифоқи киради. Ҳар бир аъзо давлат Конвенция қоидаларига риоя қилиш ва рўйхатга олинган турларнинг экспорти, импорти, реэкспорти ва денгиздан импортини назорат қилиш мажбуриятини олади. Ўзбекистон Конвенцияга 1997 йилда қўшилган.