Санкция остида қолган Матвиенко Женевада нутқ сўзлади

Россиянинг Украинага ҳарбий тажовузи туфайли Ғарб давлатларининг санкциялари остида қолган Россия Федерацияси Федерация Кенгаши раиси Валентина Матвиенко Швейцарияда бўлиб ўтган парламент спикерларининг Бутунжаҳон конференцияси тадбирлари доирасида парламент раислари – аёллар саммитида нутқ сўзлади. Кеча, 28 июль куни Женевада минбарда у Россия ҳукуматининг Украинага қарши бошлаган уруш ҳақидаги расмий позициясини тақдим этди.

Матвиенко Киев ҳукуматини “Донбасснинг тинч ҳудудларини ўққа тутганликда” ва тинч аҳолини ўлдиришда айблади. Федерация Кенгаши спикери Россия гўёки “қон тўкилишини тўхтатиш учун аралашишга” мажбур бўлганини айтди.

У, шунингдек, бошқа мамлакатларни “ахборот уруши” ва “Россияга қарши риторика”да айблаб, санкцияларни олиб ташлаш ва “тинчлик ҳимояси учун овоз бериш”га чақирди. Матвиенко, шунингдек, БМТнинг бошқа давлатлари раҳбарларини Донбассга келишга ва “Фаришталар хиёбонига” ташриф буюришга таклиф қилди.

Россия давлат ахборот агентлиги ТАССнинг ёзишича, Россия делегацияси 28-30 июль кунлари бўлиб ўтадиган Парламентлараро иттифоқ тадбирларида иштирок этиш учун 27 июль куни Женевага борган. Делегация таркибига Федерация Кенгаши раисининг ўринбосари Константин Косачев, Федерация Кенгашининг Фан, таълим ва маданият қўмитаси раиси Лилия Гумерова, Федерация Кенгашининг халқаро ишлар қўмитаси раисининг биринчи ўринбосари Андрей Денисов, Давлат Думаси раисининг ўринбосари Пётр Толстой ва Халқаро ишлар бўйича Давлат Думаси қўмитаси раисининг ўринбосари Леонид Слуцкий ҳам киради.

Швейцария оммавий ахборот воситалари июль ойи ўрталарида Матвиенко ва яна 12 нафар россиялик парламентарийнинг июль ойи охирида Женевада бўлиб ўтган парламентлараро иттифоқ тадбирлари делегацияси таркибига кирганига эътибор қаратган эди. Улар делегациянинг айрим аъзолари Швейцария ва Европа Иттифоқининг санкция рўйхатида экани, шунинг учун уларнинг кириши учун махсус рухсатнома талаб қилинишини таъкидлади.

“Blick” газетасининг сўровига жавобан, Ташқи ишлар вазирлиги Швейцария халқаро ташкилотларнинг тадбирларида иштирок этиш учун расмий делегатларнинг киришига ёрдам бериши кераклигини тушунтирди. Билдирилишича, зарур бўлганда, бундай конференциялар давомида санкциялар тўхтатилиши мумкин.