“Шереметьево”да рейслар бекор қилинди. Айбни хакерлар ўз бўйнига олди (видео)

Россиянинг “Аэрофлот” авиакомпанияси бугун, 28 июль куни эрталаб унинг ахборот тизимларида носозлик юз бергани ҳақида хабар берди.

“Шу билан боғлиқ ҳолда, парвозлар жадвалига мажбурий тузатишлар киритилиши кутилмоқда, жумладан, парвозларни кейинга қолдириш ва бекор қилиш йўли билан”, дейилади компания хабарида.

Ҳодиса ортидан ташувчи Москвадаги “Шереметьево” аэропортига ва ундан қайтадиган 42 та рейсни бекор қилди, аэропортда йўловчилар навбатлари пайдо бўлди. Москва прокуратураси тергов ишларини бошлаган.

“Аэрофлот” йўловчилардан аэропорт веб-сайтлари ва маълумотлар тахталарида кўринадиган маълумотларни, шунингдек, аэропортлардаги карнай орқали эълонларни кузатишни сўради. Компаниянинг қўшимча қилишича, улар парвоз режасини бажариш хавфини минималлаштириш ва хизматларининг фаолиятини имкон қадар тезроқ тиклаш учун ишламоқда.

“Аэрофлот” билан бир гуруҳга кирувчи “Россия” ва “Победа” авиакомпаниялари носозлик ҳақида хабар бермади.

Silent Crow ва Cyberpartisans BY хакерлик гуруҳлари “узоқ муддатли ва кенг кўламли операция” ўтказгани, натижада “Аэрофлотнинг “ички IT инфратузилмаси” “бутунлай бузилган ва йўқ қилингани”ни эълон қилди. Silent Crow  хакерлар гуруҳи бир йил давомида “Аэрофлот”нинг ички корпоратив тармоғига кириш имконига эга эканини айтди. Уларга кўра, ҳужум 7000 га яқин жисмоний ва виртуал серверларни ўчириб қўйган. Ҳужумчиларнинг таъкидлашича, улар парвозлар тарихига эга бўлган маълумотлар базаларига кириш имконига эга бўлишган, барча асосий корпоратив тизимларни бузиб киришган, ходимларнинг шахсий компьютерлари, жумладан компания бошқарув қурилмалари устидан назоратни эгаллаб олган, шунингдек, тинглаш серверлари ва ходимларни кузатиш тизимларидан маълумотларни нусхалашган.

Уларнинг ҳисоб-китобларига кўра, ўғирланган маълумотларнинг умумий ҳажми 12 терабайтни ташкил қилади.

Telegram-каналда эълон қилинган баёнотда Silent Crow барча ресурслар ё йўқ қилинган ёки энди фойдаланиш имкони йўқлигини ва қайта тиклаш ўн миллионлаб долларга тушиши мумкинлигини даъво қилмоқда. Улар етказилган зарарни стратегик деб атади.

Маълумот учун, “Аэрофлот” – Россиядаги энг йирик авиация гуруҳи. Унинг таркибига “Аэрофлот”, “Россия” ва “Победа” киради. 2024 йилда учта компания 55,3 миллион йўловчини ташиди, гуруҳнинг Россия ҳаво транспорти бозоридаги улуши 42,3 фоизни ташкил этди. 2024 йил ҳолатига кўра, “Аэрофлот” ва “Россия” авиакомпанияларининг йўналишлар тармоғи 248 та доимий йўналишни, “Победа” тармоғи эса 94 та йўналишни ўз ичига олган.

Охирги ҳафталарда Украина дронларининг ҳужумлари туфайли Россияда рейслар қайта-қайта бекор қилинди ва вақти ўзгартирилди. “Аэрофлот” жойлашган Шереметьево аэропортининг фаолияти кўпинча дрон ҳужумлари таҳдиди туфайли чекланган.