“Танзиландия” боғчасининг лицензияси бекор қилинди

Жорий йилнинг февраль ойида Тошкент шаҳрининг Мирзо Улуғбек туманида жойлашган “Танзиландия” номли хусусий боғча тарбиячилари болаларга ўта қўпол муносабатда бўлгани акс этган видео ижтимоий тармоқларда тарқалганди. Мактабгача ва мактаб таълими вазирлиги мазкур хусусий боғчасининг лицензиясини бекор қилиш бўйича Тошкент туманлараро иқтисодий судига ариза киритди. Суд эса хусусий боғчасининг лицензиясини бекор қилиш бўйича қарор чиқарди. QALAMPIR.UZ суд ҳужжати билан танишди.

Маълум бўлишича, жорий йил 14 февраль куни Мактабгача ва мактаб таълими вазирлиги ходимлари томонидан Тошкент шаҳри, Мирзо Улуғбек тумани, Кичик автомобиль ҳалқа йўли ва Буюк ипак йўли йўли кўчалари кесишмасида жойлашган “Yuksalish Construction” (“Танзиландия”) нодавлат мактабгача таълим ташкилотида ўрганиш ўтказилган. Аниқланган қўпол камчиликлар асосида хусусий боғчасининг лицензиясини бекор қилиш бўйича Тошкент туманлараро иқтисодий судига ариза киритилган.

Жорий йилнинг 19 март куни суднинг ҳал қилув қарори билан “Yuksalish Construction” хусусий боғчасининг 2019 йил 27 декабрь кунидаги МТ-1104-сон лицензияси бекор қилинган.

Суднинг қароридан норози бўлиб, жавобгар “Yuksalish Construction” хусусий боғчаси иқтисодий ишлар бўйича Тошкент шаҳар судига апелляция шикояти киритади. Кеча, 23 апрель куни соат Тошкент шаҳар судида судья Анвар Усмонов раислигида мазкур иш кўриб чиқилган. Суд ҳайъати томонидан жавобгарнинг апелляция шикоятини қаноатлантириш рад этилган ва биринчи инстанция ҳал қилув қарори ўз кучида қолдирилган.

Маълумот учун, 2019 йилдан буён фаолият юритиб келган “Танзиландия” хусусий мактабгача таълим ташкилоти ҳақида интернетга сўров киритилганда унинг директори Дилрабо Турсунова (Қудбиева) экани чиқиб келади. Қудбиеванинг ўзи ҳам Instagram’даги саҳифасида буни ёзиб қўйган. Шунингдек, у ушбу боғчанинг 7 % улушига эга. Боғчанинг Қудбиевадан ташқари яна икки таъсисчиси бор. Булар Мақсуда Қудбиева (66%) ва Мухиба Қаршиева (27 %). Очиқ маълумотларга кўра, Дилрабо Қудбиева Ўзбекистон Солиқ қўмитаси раиси Шерзод Қудбиевнинг синглиси ҳисобланади. У Фарғона политехника институтини тамомлаган, иқтисод бўйича фалсафа доктори даражасига эга.