Татаристон “Толибон” ҳарбий–техникасини таъмирлаб бериши мумкин

Татаристон компаниялари Афғонистонда “Толибон” маъмурияти томонидан фойдаланилаётган ҳарбий ва оғир техникани таъмирлаш, қайта тиклаш ҳамда уларга техник хизмат кўрсатиши мумкин. Бу ҳақда “Afghanistan International” хабар берди.

Маълум қлинишича, Россиянинг Афғонистондаги савдо маркази раҳбари Хабибуллин Татаристон компаниялари “Толибон” ихтиёридаги Россияда ишлаб чиқарилган техникаларга эҳтиёт қисмлар етказиб бериш, сервис марказларини йўлга қўйиш ҳамда хизмат кўрсатиш тизимини қайта тиклашда ҳам ҳамкорлик қилиши мумкинлигини билдирган.

Унинг айтишича, ҳамкорлик доирасида афғон мутахассисларини ўқитиш учун махсус марказлар ташкил этиш, шунингдек, Россия ва Татаристонда ишлаб чиқарилган техника учун расмий дилерлик тармоқларини яратиш ҳам режалаштирилмоқда.

Маълумотларга кўра, Афғонистонда ҳозирда Россия ишлаб чиқарган техникаларнинг катта флоти мавжуд бўлиб, улар орасида 100 дан ортиқ Ми-17 вертолётлари, 30 мингдан зиёд КамАЗ юк машиналари ҳамда 2 мингга яқин бошқа оғир транспорт воситалари бор.

Бу ташаббус Россия ва “Толибон” маъмурияти ўртасида ҳарбий-техник ҳамкорлик тўғрисидаги келишув имзолангандан сўнг юзага чиққан. Мазкур келишув жорий йилнинг 27 май куни Москвада ўтказилган Халқаро хавфсизлик форумида имзоланган бўлиб, ҳужжатни Россия Хавфсизлик кенгаши котиби Сергей Шойгу ва “Толибон” Мудофаа вазири Мулла Ёқуб Мужоҳид имзолаган.

Мужоҳиднинг Москвага ташрифи чоғида Россия билан ҳамкорликни ривожлантириш “Толибон” учун муҳим эканини таъкидлаб, икки томон ўртасида тарихий алоқалар мавжудлигини ва келгусида ҳамкорлик янада кенгайтирилишини билдирган.