Тайванлик талаба кетма-кет 4 кун компьютер ўйнагани учун вафот этди

Тайванлик талаба тўрт кун ва уч кеча давомида компьютер ўйинларини ўйнагани учун соғлиғи ёмонлашиб, вафот этди. Бу ҳақда “Oddity Central” нашри хабар берди.

Хабарларга кўра, тўртинчи куни талаба ҳожатга бормоқчи бўлганида, бирдан оғриқдан қичқириб, ўзини йўқотган ҳолда ерга қулаган. Шифокорлар унинг миядаги артерия ёрилиши натижасида катта қон кетиши юзага келганини аниқлаган.

Фавқулодда жарроҳлик амалиёти ўтказилганига қарамай, талабанинг ҳолати оғирлигича қолган. У сунъий нафас олиш аппаратига уланган ва қон босимини меъёрда ушлаш учун дорилар берилган. Кўрилган зарур чораларга қарамай, талаба бир неча ой ўтиб вафот этган.   

Шифокорлар бундай ҳодисаларни кетма-кет узоқ вақтли компьютер ўйинларидан келиб чиқадиган хавф сифатида баҳоламоқда. Узоқ вақт экран қаршисида қолиш нафақат соғлиқ учун, ҳатто инсон ҳаётига ҳам хавф солиши мумкинлиги таъкидланмоқда.

Эслатиб ўтамиз, аввалроқ Тайланднинг Пхукет оролида ўзбекистонлик сайёҳлар иштирокида йирик денгиз ҳалокати юз берганди. Korawich Marine 888 тезюрар сайр катери балиқчи траулери билан тўқнашиб, жиддий шикастланган ва ағдарилиб, чўкиб кетган.