Трамп Исроил парламентида нутқ сўзлайди

АҚШ Президенти Дональд Трамп Яқин Шарқ бўйлаб сафар доирасида Исроил парламенти – Кнессетда нутқ сўзлайди ва Мисрга ташриф буюради. Бу ҳақда у кеча, 10 октябрь куни Оқ уйдаги чиқишида маълум қилди.

Трампнинг сафари эртага, 12 октябрь кунидан “старт” олади ва 14 октябрь оқшомида АҚШга қайтиш билан якунланади. 

Трамп, шунингдек, Исроил гаровдагиларининг озод қилиниши 13 октябрь куни амалга оширилиши ва у, эҳтимол, бу жараёнда шахсан иштирок этишини айтган. 

Кнессет спикери Амир Оҳана ҳам АҚШ Президентини парламентда нутқ сўзлашга таклиф қилган эди. У Трампни “тинчлик Президенти” деб атаб, “замонавий тарихдаги яҳудий халқининг энг буюк дўсти ва иттифоқчиси” сифатида таърифлаган.

Қайд этиш жоиз, 9 октябрь куни Исроил ва ҲАМАС ўртасидаги ўт очишни тўхтатиш режими кучга кирди. Дональд Трамп томонидан ишлаб чиқилган ва икки томон томондан қўллаб-қувватланган Ғазо бўйича режанинг биринчи босқичи исроиллик гаровдагиларни фаластинлик маҳбусларга алмашишни назарда тутади.

Келишувга кўра, Исроил барча гаровдагиларни озод қилгани эвазига умрбод қамоқ жазосини ўтаётган 250 нафар ва 2023 йил 7 октябрдан бери ҳибсда бўлган 1700 га яқин фаластинликни озод қилади. Шунингдек, Исроил армияси Ғазо секторидаги келишилган чизиққа чекинади.

Трамп бу келишувни “Исроил учун ажойиб, аммо бутун дунё учун ҳам фойдали битим” деб атаган. 
АҚШдан 200 нафар ҳарбий хизматчи Исроилга жўнатилиб, у ерда ўт очишни тўхтатиш келишуви бажарилишини назорат қилувчи мувофиқлаштирувчи марказ тузади. Улар Ғазо секторига кирмайди, балки логистика, хавфсизлик, муҳандислик ва режалаштириш йўналишларида ишлайди.

Эслатиб ўтамиз, тинчлик келишувига эълон қилинганидан сўнг, Исроил Бош вазири Биньямин Нетаньяху АҚШ Президенти Дональд Трамп билан телефон орқали “ҳис-туйғуга бой” ва илиқ суҳбат ўтказганди. Суҳбат давомида Нетаньяху Трампни Исроил парламенти – Кнессетда нутқ сўзлашга таклиф қилган.