Трамп маъмурияти TikTok келишувидан катта улуш олиши мумкин

АҚШ Президенти Дональд Трамп маъмурияти TikTok’нинг Америка бўлинмаси устидан назоратни инвесторлар гуруҳига ўтказиш бўйича воситачилик қилгани учун 10 миллиард долларгача мукофот олиши мумкин. Бу ҳақда “The Wall Street Journal” хабар берди.

Нашр маълумотларига кўра, TikTok’нинг АҚШдаги бизнеси инвесторлари машҳур иловани Америка бозорида сақлаб қолиш эвазига АҚШ ҳукуматига бир неча кўп миллиардли тўловларни амалга оширишга рози бўлган.

Инвесторлар таркибига булутли ҳисоблашларга ихтисослашган Oracle компанияси, Silver Lake хусусий инвестиция компанияси ва Абу-Дабидаги MGX инвестори кирган. Манбаларнинг сўзларига кўра, маъмуриятга хайрихоҳ бўлган ушбу инвесторлар TikTok’нинг Америка бўлинмасини Хитойнинг ByteDance бош компаниясидан қабул қилиб олган.

Қайд этилишича, январь ойида келишув якунлангач, АҚШ Молия вазирлигига тахминан 2,5 миллиард доллар ўтказиб бўлинган. Келгусида умумий суммани 10 миллиард долларга етказиш учун яна бир неча тўловларни амалга ошириш режалаштирилган.

Таҳлилчиларнинг таъкидлашича, АҚШ ҳукумати учун бундай миқёсдаги тўлов деярли мисли кўрилмаган ҳолат бўлиши мумкин.

Эслатиб ўтамиз, аввалроқ TikTok ижтимой тармоғи Европа Иттифоқида фойдаланувчиларнинг ёшини аниқлаш бўйича янги технологияларни яқин вақт ичида жорий этишни бошлаши ҳақида хабар берилган эди.