Трамп маошини нималарга сарфлашини айтди

АҚШ Президенти Дональд Трамп ўзини маошини эҳсон қиладиган “деярли ягона Президент” деб атади. У, шунингдек, топган пулини қандай мақсадларга йўналтиргани ҳақида ҳам маълумот берди. Бу ҳақда у ўзининг Truth Social ижтимоий тармоғидаги саҳифасида ёзди.

Америкалик етакчининг ёзишича, у ўз маошини эҳсон қилаётган ягона Президентлигидан (АҚШнинг биринчи президенти Жорж Вашингтондан ташқари) фахрланади.

“Менинг биринчи “маошим” Оқ уй тарихий ассоциациясига зарур бўлган гўзал “Халқ уйи”ни реконструкция қилиш учун кетди”, дейди у.

Трамп, шунингдек, Оқ уйда у асос солинганидан бери мисли кўрилмаган даражада кенг кўламли янгиланиш ва ободонлаштириш ишлари олиб борилаётганини айтди.

Маълум қилинишича, бу сўзлар Оқ уйдаги янги бал учун зал қурилиши ҳақида ҳам бўлиши мумкин. Олдинроқ ижтимоий тармоқларда Трампнинг Оқ уй томида юргани ва Президент қароргоҳини қайта қуриш бўйича эҳтимолий вариантларни кўздан кечираётгани акс этган видео тарқалди. Ўшанда хусусий ҳомийлар Оқ уйда тахминан 200 миллион долларлик янги зал қурилишини молиялаштириши режалаштирилаётгани ҳақида хабарлар чиқди.

АҚШ Президентининг матбуот котиби Кэролайн Ливиттнинг айтишича, зал қурилиши жорий йилнинг сентябрь ойида бошланиши режалаштирилган ва бу иш Трампнинг ваколат муддати тугашидан анча олдин якунланади.