Трамп Мексика ҳудудига зарба бериш эҳтимолини инкор этмади

АҚШ Президенти Дональд Трамп Мексикага зарба бериш эҳтимолини истисно этмади. Бу ҳақда у кеча, 17 ноябрь куни Оқ уйда журналистлар билан суҳбатда сўз очди.

“Бу мени қониқтиради. Наркотик оқимини тўхтатиш учун нима қилиш керак бўлса, шуни қилишимиз шарт”, дейди АҚШ Президенти журналистнинг саволига жавобан.

Трампнинг айтишича, у Мексиканинг ҳаракатларидан “мамнун эмас”. Шунингдек, у наркотрафикни тўхтатиш учун ҳарбий чоралар кўриш қарори қабул қилинса, бундан “фахрланишини” айтган. Бироқ бундай қадам ташланадиган бўлса, аввало Конгрессга мурожаат қилишини билдирган.

“Демократлар ҳам, республикачилар ҳам, агар ақлдан озмаган бўлишса, бунга рози бўлишади. Демократлар эса бироз тентакроқ”, дейди Трамп.

Трамп, шунингдек, Колумбиядаги “кокаин ишлаб чиқарувчи фабрикалар” ҳақида гапириб, уларни йўқ қилишга шахсан “фахр билан” буйруқ беришни исташини айтган.

“Мен буни қиламан демаяпман, аммо бундан фахрланардим”, дейди у.

Шу билан бирга, ўтган ҳафтада АҚШ Давлат котиби Марко Рубио АҚШ Мексика билан наркокартелларга қарши курашда “илгари ҳеч қачон бўлмаган даражада яқин ҳамкорлик қилаётганини”, Трамп маъмурияти эса мамлакатга қарши “якка тартибдаги ҳаракатлар” ёки қўшин киритишни режалаштирмаётганини билдирган.

АҚШ бир неча мексикалик наркокартелларни хорижий террористик ташкилотлар рўйхатига киритган. NBC’нинг ноябрь бошидаги хабарига кўра, Трамп маъмурияти Мексика ҳудудида ерусти операцияларини режалаштирмоқда. Манбаларга кўра, АҚШ ҳарбийлари дронлардан фойдаланиб, нарколабораторияларни, шунингдек картель аъзолари ва етакчиларини нишонга олиши мумкин.

Эслатиб ўтамиз, аввалроқ Дональд Трамп Венесуэлага қарши қуруқликдаги операцияни бошлаш ёки зарба бериш масаласида ҳали қарор қабул қилмагани ҳақида хабар берилган эди. Трампнинг назарида минтақада АҚШ ҳарбийларининг кучайтирилган иштироки, жумладан мамлакатнинг энг замонавий авианосецининг жойлаштирилиши ва 15 минггача ҳарбий хизматчининг юборилишининг ўзиёқ босим воситаси бўлиб, Венесуэла Президенти Николас Мадурони бевосита ҳарбий аралашувсиз истеъфога беришга мажбур қилиши мумкин.